Dala Junta: sojornanza dles scuadres dl palé te Südtirol
Tl dagní sarál danter i critérs por le finanziamënt publich ales sojornanzes estives dles scuadres dl palé te Südtirol ince le numer di apascioná.
Aladô dles diretives dl 2014 pó la Provinzia de Balsan conzed ales organisaziuns turistiches n contribut dl 50 porcënt por sojornanzes dles scuadres dal palé che s’arjigna ca tratan l'isté te Südtirol por le proscim campionat. Na condiziun é che la scuadra vëgnes da na regiun relevanta por le Südtirol dal punt de odüda turistich y che ara süghes tl campionat plü alt de vigni Paisc. La scuadra mëss implü sojorné almanco 10 dis te Südtirol. Le finanziamënt plü alt é de 20mile euro, mo al pó rové ince a 40mile euro tl caje che la scuadra ais tut pert ti ultims trëi agn ala Champions League, se ais cualifiché ala proscima ediziun dl campionant europeich plü important dl palé y, sciöche criter nü, sides ti pröms cinch posć nazionai por numer de apascioná.
Incö á la Junta provinziala aprové chësc adatamënt pro l’assegnaziun dl contribut che reverda le numer di apascioná por scuadra, deache la ressonanza dles sojornanzes dles scuadres dl palé te Südtirol depënn en buna pert ince dal numer di apascioná, tröc de chisc vëgn ince a ti ciaré ai alenamënc söl post. Le numer di apascioná vëgn inrescí tres i dac ofiziai dles Federaziuns nazionales competëntes. La novité gnará bele aplicada cun inann.
rc
