Dala Junta: aprové le program anual dla STA
La Junta provinziala á aprové incö le program anual dla STA (Strotöres Trasport Südtirol) sön infrastrotöres y mobilité sostenibla.
La STA, sozieté inhouse dl Departimënt Mobilité dla Provinzia, é le partner por realisé proiec de dorada lungia che la Junta provinziala conscidrëia de importanza strategica por le Südtirol: la gestiun dla rëi dles ferates locala, l’infrastrotöra y les ferates, l’ampliamënt y la modernisaziun de formes de mobilité sostenibla, la sensibilisaziun di zitadins y l’aumënt dla segurëza stradala. Sön proposta dl assessur por la mobilité Florian Mussner á la Junta provinziala aprové incö le program de gestiun dl 2016 dla STA cun n finanziamënt complessif dla Provinzia de 5,8 miliuns de euro. Por i proiec d’investimënt â la Junta bele preodü n finanziamënt de cinch agn da 400 miliuns de euro: danterlater pro l’eletrficaziun dla linia dla Val Venosta, che dess mët man ciamó inann.
Sorvisc de trasport cun les ferates y corieres
Danter les mosöres concretes dl program anual dl STA él la gestiun dla linia dles ferates dla Venosta y la zircolaziun de ferates FLIRT nöies, le ressanamënt dla linia dla Val de Puster, le coordinamënt por la cumpra de corieres nöies a idrogen. Danter les ativités anuales él ince da ciafé la gestiun dles staziuns dles ferates tl Südtirol. Al ti vëgn dé n gran pëis ala buna combinaziun danter i sorvisc de ferata, coriera y rodes, a na manira che düc i zitadins pois adoré les formes de mobilité desvalies. Le program prevëiga implü de plü laurs pro les fujines dles corieres sön döt le raiun provinzial.
Formes de mobilité alternatives
La STA laora ince por promöie na mobilité „vërda“, la Green Mobility, cun l’obietif da fá aldinfora dl Südtirol na regiun d’ejëmpl dla mobilité alpina sostenbila cun l’obietif da sconé l’ambiënt, aumenté la cualité dla vita y la competitivité economica. Te chësc setur gestësc la STA de plü proiec che reverda i seturs dla mobilité eletrica, dla mobilité sön les rodes y dl’intermodalité tl trasport de porsones. Da plü mëisc é ince atif le grup de laur sön la Green mobility, che vëgn coordiné dal Departimënt por l’Ambiënt y che é inciarié da elaboré strategies y mosöres por na mobilité tres plü sostenbila.
Sensibilisaziun y segurëza sön strada
N ater setur strategich por la STA é la sensibilisaziun di zitadins por formes de mobilité sostenibla, nia ma cun na presënza sön internet tres plü grana, mo ince cun proiec sciöche „Südtirol pedalëia“, la realisaziun de fossenares por auti eletrics, box por lascé les rodes tles staziuns y la colaboraziun cun Comuns y assoziaziuns turistiches. Por aumenté la segurëza stradala organisëia la STA ince ativités de formaziun tl Safety Park a Pfatten: al é preodü de plü cursc por motoziclisć, autisć de corieres, privac, paurs, aziuns por scores y jogn tres la campagna de sensibilisaziun „SOS Zebra“.
rc
