#prömtëmp Kompatscher/3: renforzé l’autonomia
Plü autonomia y plü rëi cun l’Europa: le presidënt Arno Kompatscher á antizipé i proscims vari tratan l’incuntada cun i media. Dui evënc y n museum nü.
L’incuntada de mesa legislatöra cun i rapresentanc di media é stada na sort de conferënza stampa en movimënt cun trëi architades al intern y al estern dla fortëza de Franzensfest, „che sará le proscim museum provinzial nü cun le messaje dl Südtirol sciöche raiun de confin, de passaje y dl’autonomia“, á antizipé Kompatscher. La terza pert dla conferënza stampa é gnüda dedicada dal presidënt al svilup dl’autonomia. La vijiun por le dagní reverda trëi punc: „na Provinzia lëdia, chël ó dí che ne mëss nia depënn da dezijiuns da d’atri ince por merit de n’autonomia sterscia, n Südtirol davert y te na rëi cun l’Euregio, cun l’Europa y cun le monn y n Südtirol che costruësc n sentimënt de comunité y de portignënza por merit dl’autonomia.“
Por ci che reverda le renforzamënt dl’autonomia á le presidënt Kompatscher recordé che al é gnü aprové 9 normes d’atuaziun nöies (la proscima sará chëra sön la ciacia) y 11 leges statales che ti dá competënzes ala Provinzia. „La sfidada plü grana sará naturalmënter la reforma dla Costituziun, che ne reverda nia l’autonomia dl Südtirol cina al vare dl ajornamënt dl Statut en acordanza danter la Provinzia y le Stat conscidran ince la proteziun internazionala dl’autonomia tres l’Austria“, á recordé Kompatscher.
La secunda pert dla vijiun futura dl Südtirol é le coliamënt cun le monn: „Na rëi de colaboraziun che ne dess nia ma ester digitala y che reverda i coliamënc dla mobilité sura i confins fora, mo ince dal punt de odüda politich“, á splighé le Landeshauptmann. Deache al s’á mudé le sistem europeich de govern, „él les relaziuns y i contac cun i Stac y les Regiuns che cunta deplü aldedaincö. Y nos sun atualmënter te na rëi cun dër de bugn raporc cun Roma, Viena, la Comisciun europeica y cun les Regiuns alpines.“ Te chësc contest á Kompatscher ince recordé la funziun de mediaziun tratan la costruziun de na bariera de confin söl Prener y á descurí ince n particolar: i laurs de costruziun dla bariera söl Prener da pert di soldas austriacs ê bele tan co tl mëte man, ma por merit dl’incuntada a Desproch cun le minister dl intern Sobotka él sté meso da archité chësta prozedöra y da organisé n’incuntada cun le minister Alfano. Chësta é ince la funziun dla Euregio adöm cun le Tirol y le Trentin „y che reverda ince proiec cun vantaji por döta la popolaziun sciöche por ci che reverda le trafich, la mobilité publica y la sanité“, á dit Kompatscher. N atra rëi de colaboraziun é la macroregiun alpina EUSALP de chëra che al fej ince pert d’atres 47 regiuns.
Proscimamënter sará l’autonomia ince tl zënter de dui evënc importanc, cun le pröm ai 17 d’agost a Ciastel Prösels a Fie cun le presidënt dla Comisciun europeica Jean Claude Juncker por rajoné dl rode dles Regiuns y dles sfidades euroeiches nöies y ai 5 de setëmber a Ciastel Firmian le De dl’autonomia, 70 agn do l’Acordanza de Paris, cun i ministri atuai por i afars esterns dla Talia y dl’Austria Paolo Gentiloni y Sebastian Kurz.
Insciö á le presidënt Kompatscher ince splighé süa portignënza: „Al me fajess plajëi che vignun de nos podess se sintí pert de chësta comunité, da se identifiché cun ëra y da ester cosciënt da podëi se costruí so dagní ince por merit di stromënc che l’autonomia nes mët a desposiziun.
Imajes conferënza Kompatscher https://we.tl/EWN0RoYt8w
Intervistes Kompatscher
https://we.tl/Yqf8sGbvWA
https://we.tl/5XmBGCCgfl
https://we.tl/4ia1PEr6mW
File audio MP3 https://we.tl/yPSQVyBp4i
rc
Galaria dales fotografies
