Dala Junta: sorvisc feroviars dla Provinzia, contrat cun la SAD
La Junta provinziala á formalisé incö l’intenziun da ti surandé ala SAD por atri 8 agn le contrat por i sorvisc feroviars de competënza provinziala.
I sorvisc feroviars de competënza provinziala ti é atualmënter gnüs surandá en conzesciun ala SAD Spa cina lugio dl 2017. Incö á la Junta provinziala confermé l’orenté da renové chësta colaboraziun y da ti surandé diretamënter ala SAD la conzesciun cina l’ann 2024, por ester ince en linia cun le contrat de sorvisc cun Trenitalia. La normativa europeica prevëiga ince la surandada direta di sorvisc feroviars tres n contrat de sorvisc y nia la publicaziun de na bandida de gara. „Sides cun Trenitalia co cun la SAD é la colaboraziun tl setur dl trasport feroviar local dër buna y costrutiva. I orun jí inant sön chësta strada che ti porta ince tröc vantaji ai anuzadus“, sotlignëia l’assessur por la mobilité Florian Mussner.
Danter i criters dl contrat prevëiga la Junta le mantignimënt dl numer di iadi atual dla Sad, n aumënt poscibl en relaziun ince al alzamënt dl sorvisc dl trasport provinzial y la promoziun de proiec che reverda la mobilité sura i confins fora. Al é preodü danterlater ince standarg de cualité da tigní ite y la modernisaziun dles ferates cun la cumpra de set ferates eletriches, tignin cunt ince dl’eletrificaziun dla linia dla Val Venosta.
Al é ince preodü premies che reverda la contentëza cun le sorvisc da pert di anuzadus y l’elaboraziun de na „Cherta dla cualité“ en colaboraziun cun la Zentrala di Consumadus. Do l’aprovaziun da pert dla Junta gnarál sëgn elaboré da pert di esperc na pröma proposta de n contrat de sorvisc adaté ales esigënzes dla ferata te Südtirol.
rc
