Dala Junta: inrescida scientifica, al vëgn finanzié atri dui proiec
La Junta provinziala á aumenté incö de zirca 390mile euro i mesi de sostëgn por proiec che reverda l’inrescida scientifica tratan la perioda 2016-18.
La terza bandida de concurs á albü cun 161 propostes n gran suzes y de chisc á la Junta chirí fora 12 proiec che á ciafé dötadöm n finanziamënt da 2,5 miliuns de euro por la perioda 2016-2018. Incö á la Junta provinziala metü a desposiziun implü 387.000 euro por finanzié atri dui proiec che vëgn conscidrá de gran valüta tl’inrescida ti seturs dla medejina y dla linguistica. Le pröm proiet reverda n’inrescida sön la degeneraziun dles orëdles y che gnará fata en cooperaziun dnater la facolté de medejina dl’Université da Desporch cun le ospedal da Porsenú. Le secundo proiet reverda indere le plurilinguism cun l’analisa dl’adoranza di lingac di scolars südtirolej y che gnará efetué dal EURAC. Insciö á le presidënt dla Provinzia Arno Kompatscher confermé l’orenté da orëi amplié le finanziamënt preodü te chësc setur alzan les ressurses finanziares a desposiziun pro chësta bandida por sostigní dui proiec implü. I proiec che vëgn finanziá dala Provinzia é insciö indöt 14 y reverda i seturs plü desvalies cun la partezipaziun de studënc y scienziá de tröpes istituziuns de inrescida provinziales: al se trata dl’Université de Balsan, l’EURAC, le Museum Natöra, le Museum Archeologich, mo ince les Universités de Trënt y Desproch.
rc
