Strades y mobilité tla Val Badia y te Puster: Mussner incunta i ombolc
I intervënc ti seturs dla rëi stradala y dla mobilité é gnüs debatüs dal assessur Florian Mussner adöm ai rapresentanc di comuns dla Val Badia y de Puster.
La tematica prinzipala dl’incuntada danter l’assessur por la mobilité y i rapresentanc di Comuns y dla Comunité raionala é stada la planificaziun di intervënc ti seturs dl sorvisc strades, dl’infrastrotöra y dla mobilité, dantadöt en conscidraziun dla segurëza stradala y dla sostenibilité ambientala. L’assessur Florian Mussner á sotligné l’importanza dla colaboraziun cun i Comuns por ci che reverda la fasa de planificaziun por adoré i mesi a desposiziun te na manira otimala y por ti pité ai zitadins soluziuns otimales.
Laurs da asfalté é sön le program prësc te vigni Comun dla Comunité comprensoriala, á splighé le diretur dla Repartiziun Sorvisc Strades Philipp Sicher. Bele metü man á i laurs da asfealté danter l’ater ti Comuns de Corvara, Badia, Sanciana, Sexten, Toblach, Mühlbach, Vintl y Türesc. Intervënc por la metüda en segurëza dles strades é söl program sön la strada che porta al Ju de Frara y sön la strada statala dla Val Badia. Laus de metüda en segurëza dala tomada de peres vëgn efetuá tles vijinanzes de Picolin a San Martin. Implü vëgnel ince scrit fora i laurs inann por la metüda en segurëza dala tomada de peres dla strada statala dla Val Badia a Pîdro.
Por ci che reverda le program dala Repartiziun Infrastrotöres - insciö á splighé le diretur Gustav Mischí - vëgn i laurs de ressanamënt y de modernisaziun dles strades, di punc y dles galaries efetuá aladô de na lista plurianuala. Da püch él gnü stlüt jö y al vëgn stlüt jö tosc i laurs por l’ampliamënt dla strada provinziala a San Martin y a Rina, sön la strada statala a Pîdro. Tosc gnarál ince scrit fora i laurs pro l’incrujiada danter Bornech y San Laurënz sciöche ince les mosöres de compensaziun por l’ampliamënt dla strada statala dla Val de Puster a Vintl.
La colaboraziun danter i Comuns y la Repartiziun Mobilité reverda dantadöt la planfiicaziun de architades y di orars dles corieres y ferates cun ince l’elaboraziun de conzec de mobilité adatá ales esigënzes locales, á splighé le diretur dla Repartiziun Günther Burger. Debatü él gnü danterater i proiec dla Riggertalschleife y dl zënter de mobilité a Bornech, mo ince le potenziamënt dles linies dles corieres che porta ales localités turistiches, sciöche sön i Jus dles Dolomites. Inann él le pröm ann che les corieres passa d’isté vigni ora söi jus dolomitics, ater co de domënia.
I ombolc á porté dant tratan l’incuntada de plü consëis y idees por proiec ti proscims agn. Le diretur de Departimënt Valentino Paganí á recordé che la Provinzia á cumpré de plü radars por aumenté la segurëza stradala che gnará adorades te döte le raiun provinzial dantadöt sön les trates plü adorades y cun na prozentuala de inzidënc alta. Aladô dl assessur Mussner él inann a desposiziun indöt 90 miliuns de euro por la Repartiziun Infrastrotöres, 49 miliuns por le Sorvisc Strades y indöt 202 miliuns por la Mobilité. „Chëstes ressurses gnará investides sön döt le raiun provinzial aladô de na lista de priorités tlera cun l’obietif da aumenté la segurëza sön strada, da avëi punc y tuní ressaná y n sistem dl trasport publich a bunmarcé y atratif por i zitadins“, insciö Mussner.
rc
