Dala Junta: aministraziun asvelta, reorganisaziun di ofizi
Reorganisaziun dl'aministraziun: öna na direziun por les döes scores profescionales talianes, les direziuns raionales dles scolines passa da trëi a döes.
La reorganisaziun di ofizi provinziai é un di pilastri fondamentai dl proiet dl’inovaziun aministrativa scomencé dal’assessuria Waltraud Deeg tl otober dl 2014. N percurs che reverda la reorganisaziun de 22 ofizi, repartiziuns y atres strotöres d’organisaziun. „L’obietif prinzipal é chël da avëi n’aministraziun provinziala plü moderna y trasparënta cun manco burocrazia tles prozedöres“, insciö l’assessuria Deeg. N ater vare inant te chësc vers é gnü fat incö dala Junta provinziala cun l’aprovaziun de na seria de operaziuns de acorpamënt y de trasferimënt dles competënzes che reverda ince de plü les direziuns.
Danter i passaji plü importanc dles döes deliberes aprovades incö dala Junta él chëra che reverda la scora taliana. Öna dles mudaziuns é chiló l’acorpamënt dles scores profescionales Levinas de Balsan y dla scora Mattei de Porsenú che sará sot ala medema direziun y le smendrimënt di raiuns de destribuziun teritoriala dles scolines talianes (ciamó en fasa de elaboraziun) che passa da trëi a dui raiuns (y de conseguënza ince döes direziuns raionales). Atres mudaziuns reverda implü i acorpamënc interns tles Repartiziuns Finanzes, Aministraziun dl Patrimone, Agricoltöra, Mobilité y Europa.
rc
