Dala Junta: n pat y criters por sostigní l’integraziun
La Junta provinziala á aprové incö le pat por l’integraziun di zitadins migranc y i criters por l’atuaziun dles mosöres preodüdes.
Aladô di dac ASTAT êl presënc tl Südtirol ala fin dl 2015 indöt 46.454 porsones da foradecá che vëgn da 136 Paisc. Por afronté les sfidades y oportunités nöies dl prozes d’integraziun laora la Provinzia dal 2015 inant a n Pat por l’integraziun „che ti dais a chësc prozes na cornisc politica nezesciara por arjunje n’integraziun che respidlëises na conviënza pazifica“, á dit l’assessur competënt Philipp Achammer. Adöm ala colaboraziun da dötes les perts interessades él gnü elaboré les diretives che reverda le laur de intlujiun cun la definiziun ince di obietifs te chësc ciamp. Dötes les propostes é spo gnüdes integrades te na pröma proposta dal titul „Convivënza tl Südtirol – N pat por l’integraziun“ che é gnüda aprovada de jügn dala Consulta provinziala por l’integraziun. L’assessur Philipp Achammer á spo presenté le program incö tla Junta adöm ince ai criters por la promoziun dl’integraziun. Trami dui i documënc é gnüs aprová incö dala Junta.
Le pat contëgn les diretives por afronté l’integraziun sciöche convivënza regolamentada, la desponibilité al impëgn y la scomenciadia personala, l’arichimënt y l’oportunité. Les arees d’intervënt ne reverda insciö nia ma le lingaz y la formaziun, la profesciun y le laur, la sanité y i afars soziai, mo ince l’abité y la convivënza, la familia y i jogn, la cultura, la religiun y le tëmp lëde. „Ai migranc ne ti vëgnel nia damané da olache ai vëgn, mo co che ince vëi pó contribuí al bun funzionamënt dla sozieté locala“, á dit l’assessur Achammer.
N impëgn da trames döes les perts y che reverda dantadöt n raport danter avëi y fá, insciö Achammer. „La Provinzia mëss fá deplü, sciöche por ejëmpl organisé cursc por imparé i lingac, mediaziun interculturala, reconescimënt dles cualificaziuns di zitadins che vëgn da d’atri Paisc.“ La definiziun de avëi reverda indere l’impëgn personal, dantadöt por ci che reverda la conescënza di lingac: „I fajarun n’inrescida sön la poscibilité da colié la desponibilité personala y l’orenté da s’integré cun la conzesciun de prestaziuns ajuntives da pert dla Provinzia. Chiló nen vara nia de prestaziuns nöies, mo de chëres bele esistëntes che ne reverda nia ma l’assistënza nezesciara por suravire“, á prezisé Achammer. Incö á la Junta ince inciarié l’assessur da studié la basa iuridica por la conzesciun de mosöres ajuntives.
I criters por sostigní l’integraziun prevëiga indere contribuc ai Comuns y ales Comunités raionales por scomenciaides de promoziun di prozesc d’integraziun y de intlujiun a livel local, por la cooperaziun y la metüda en rëi danter i Comuns y les Comunités raionales. Al pó ince gní finanzié mosöres de promoziun che reverda la partezipaziun dles porsones migrantes ala vita soziala, por sensibilisé l’opiniun publica, de formaziun y de ajornamënt tl setur dl’integraziun.
rc
Galaria dales fotografies
