Mostra 100 Ani Ferata de Gherdëina: Giaurida ai 01/08
100 ani Ferata de Gherdëina ie l titul dla mostra che unirà giaurida ai 1 de agost dala 18.00 tla biblioteca Tresl Gruber de Santa Cristina.
Te chësta mostra vëniel mustrà su la storia dla ferata danter l 1916 y i ani '60 che descëida truep lecorc dantaldut danter la populazion de Gherdëina. La ferata de Gherdëina ie un di majeri proiec dla mobilità tla Ladinia. Te na retrospetiva cun prësciapuech 30 fotografies storiches à l Museum de Tluses realisà na mostra sun la cundizions ntan la costruzion, l svilup a n 'atrazion turistica y i lëures de mudernisazion dla trassa dla ferata ntan i ani 1950. La mostra unirà giaurida
n lunesc, ai 1 de agost,
dala 18.00,
tla sënta dla biblioteca „Tresl Gruber“
a Santa Cristina.
La mostra ie na cunlaurazion danter l Museum de Tluses adum cun l’Archif dl trasport dl Tirol, la Repartizion Cultura ladina dla Provinzia, la Biblioteca "Tresl Gruber" y l Cunsëi de Furmazion de Santa Cristina.
Nfurmazions n curt
Fata su ti ani 1915-1916 ova la ferata de Gherdëina dantaldut la funzion de mené material de viera y roba da maië da Tluses nchin te Plan, per pona mené dut inant sun la front de viera. L lëur de costruzion ie unì fat da ndut 10.000 saudeies, de chisc fova prësciapuech 6.000 perjunieres rusc che ie unii piei dal Mper austro-ungarich tl 1914. La ferata piova via da Tluses y ruova te Plan furnan tres Laion, San Piere, Urtijëi, S. Cristina y Sëlva. La ova na lunghëza de 32 chilometri cun n deslivel de 1.074 m. Do la fin dla Prima Viera Mundiela ie la ferata unida nuzeda sciche trasport publich nchin tl ann 1960 ulache la ie unida tëuta ju ajache si mantenimënt ne se paiova nia plu.
rc
