Dala Junta: Ferata dl Prener, assunziuns nöies, percurs storich
D’atres dezijiuns dla Junta é stades n’acordanza Provinzia-STA por la realisaziun de barieres sön la linia dl Prener y assunziuns nöies tl setur scolastich.
La realisaziun de barieres cuntra la vera dai 4 ai 5 metri altes por cater chilometri: chësta é stada na dezijiun dla Junta provinziala incö, mertesc ai 26 de lugio, y reverda da plü daimpró la costruziun de barieres cuntra le desturb acustich sön la linia dl Prener ti Comuns de Pruca, Porsenú (zona dla staziun), Tlüses (staziun), Branzoll y Balsan. „Al se trata de na mosöra che pó gní realisada por merit dl’aprovaziun da pert dl Minister dl Ambiënt“, á splighé l’assessur competënt Richard Theiner. Cun la deliberaziun da incö á la Junta inciarié la STA (Strotöres trasport Südtirol) da se fistidié dla proietaziun, i cosć sará partis sö por l’80 porcënt a RFI y por le 20 porcënt ala Provinzia.
Implü á la Junta provinziala ince aprové incö la delibera sön les assunziuns dl personal didatich tles scores primares y secondares, na mosöra che definësc les operaziuns aministratives por l’assegnaziun de contrac a tëmp determiné y indeterminé ai insegnanc che é tla gradatöra de abilitaziun. „I ún mantigní ci che é gnü impormetü aprovan la delibera che ti consënt ales Intendënzes scolastiches da aumenté le numer di posć a desposiziun por l’assegnaziun di posć de rode“, á splighé l’assessur Tommasini. N articul dla delibera ti consënt insciö ales singules Intendënzes, do n’arat ince da pert di sindacac, da amplié le numer dles assunziuns a tëmp indeterminé ince por merit dla poscibilité da aumenté la porcentuala sön chëra che al vëgn spo calcolé la cuota dles assunziuns.
La Junta á dé n arat positif incö sön n proiet a Natz/Schabs che reverda la realisaziun de n percurs dla memoria sön la perioda dla Vera frëida (Kalter Krieg). Le raiun, olache al dess gní realisé le proiet, é l’areal ex NATO, la basa militara taliana-americana „Site Rigel“ cun n deposit de ermes convenzionales y n setur de segurëza manajé dala US Army cun dui bunker por ermes nucleares. „Sön chësc areal gnarál realisé n percurs dla memoria che reverda la Vera frëida por ti splighé dantadöt ai jogn chësta perioda storica locala y internazionala“, insciö Tommasini. I cosć de realisaziun sará de 960mile euro che gnará sostignis dla Comun tres i fonds BBT por les mosöres de compensaziun ambientala. La Junta á messará dé ciamó süa aprovaziun tres na delibera deache le raiun fej pert dl patrimone provinzial.
rc
