70 agn Acordanza de Paris: ediziun speziala dla revista provinziala
Ai 5 de setëmber vëgnel recordé i 70 agn dal’Acordanza Gruber-Depasperi. Por chësta gaujiun él gnü realisé n’ediziun speziala dla revista "Das Land Südtirol".
L’ediziun speziala dla revista dla Junta „Das Land Südtirol“ sará da ciafé adöm ai foliec „Dolomiten“ y Alto Adige“ da indoman, ai 29 de lugio, inant y é gnüda publicada en gaujiun di 70 agn dal’Acordanza de Paris. De plü é les tematiches presëntes tl foliet: da documënc storics, a contribuc de esperc dla storia, da professurs cina a jornalisć che analisëia la storia dl Südtirol y le percurs dl'autonomia ti ultims 70 agn cina aldedaincö.
Te sües parores de introduziun al numer spezial á le presidënt dla Provinzia Arno Kompatscher tut sö l’imaja dla pröma plata che recorda sciöche de plü generaziuns de politics é stá bugn da svilupé inant, adöm a n sostëgn tres plü ampl tla popolaziun, l’autonomia da na picera planta cina a fá aldinfora n lëgn gaiert y florënt: „Chësc lëgn pó sëgn crësce inant sot le bröm dl’Europa y ester ciamó plü gaiert, sce nos düc le orun y sce düc i grups linguistics laora deboriada.“
L’ediziun speziala trata ince de plü ejëmpli y arjuntes por la sozieté che pê aldedaincö por tröc cosses normales. N’odlada tl dagní vëgn presentada da plü direturs y caporedaturs de foliec locai. Le numer antizipëia implü i contignüs y i reladus de döes incuntades publiches cun chëres che la Provinzia ó festejé l’aniversar dl De dl’Autonomia te setëmber. De plü copies dl’ediziun speziala é ince gnüdes partides fora ti ofizi dla Provinzia, tles biblioteches y pó gní damanades do tl Ofize stampa provinzial tl Palaz Widmann (contat email: usp@provincia.bz.it).
rc
