Sorvisc zivil volontar provinzial: ciamó posć lëdi
N valgügn posć resservá a jogn dai 18 ai 28 agn é ciamó a desposiziun por düc i interessá che ó fá n’esperiënza tl ciamp dl sorvisc volontar provinzial.
La Junta provinziala á aprové por le 2016 indöt 152 posć por i jogn che á l’intenziun da fá n sorvisc zivil provinzial: n valgügn de chisc posć é ciamó a desposiziun. Chësta esperiënza ti pormët ai jogn da daidé d’atri tres ativités a bëgn dla comunité y te n spirit de solidarieté. I volontars mëss avëi n’eté danter i 18 y i 28 agn, ester residënc tl Südtirol y ne avëi nia ciamó fat le sorvisc volontar. Sciöche davagn él preodü na retüda dles spëises de 450 euro y por le pröm iade pon ince chirí fora sce an ô fá n volontariat de 8 a de 12 mëisc, cun almanco 30 ores al edema.
Le sorvisc zivil provinzial pó gní fat te ënc y assoziaziuns te chisc seturs: assistënza soziala y sanitara, reinserimënt sozial y intervënc d’emergënza, educaziun, sorvisc jogn y promoziun culturala, sconanza dl patrimone ambiental y artistich, proteziun zivila, sconanza di dërc di consumades y di utënc, educaziun al svilup, ativités dl tëmp lëde y de educaziun sportiva.
I jogn interessá mëss presenté süa candidatöra diretamënter ai ënc y assoziaziuns acreditades che fajará spo la seleziun. Por plü informaziuns y na descriziun monüda di proiec prëibel s’informé sön la plata internet dl Sorvisc zivil volontar provinzial, da olache an pó ince desciarié i formulars por l’iscriziun.
rc
