Kompatscher söl esport: impëgn dla Provinzia, IDM, aziëndes
„L’impëgn dla Provinzia, IDM y dantadöt dles impreses á porté sü früc, sëgn jun inant sön chësc percurs“: le presidënt Kompatscher söi dac da record dl esport.
Esportaziuns record tl Südtirol: por le pröm iade dal 1996 él l’ avalianza dl comerz che stlüj cun n valur positif, sciöche comuniché incö dal’ASTAT. L’avalianza dl comerz reverda la desfarënzia danter dötes les esportaziuns en confrunt dles importaziuns de na regiun te na perioda spezifica. Tl 2015 é insciö les esportaziuns chersciüdes tl Südtirol te na manira tlera en confrunt al ann passé (+9,8 porcënt) cun n valur record de 4.358,3 miliuns de euro. N dat de morvëia é che l’ann passé é l’aumënt dles esportaziuns set iadi tan alt co l’aumënt dles importaziuns tl Südtirol. Por ci che reverda la chersciüda tl 2015 a livel nazional él gnü registré n aumënt sides dles importaziuns (+3,3 porcënt) co ince dles esportaziuns (+3,8 porcënt).
„I sun dër contënc de chisc dac, ince deache n aumënt ne é nia na cossa saurida conscidran i tëmps atuai“, á dit le presidënt dla Provinzia Arno Kompatscher y recorda che „le sostëgn y la consulënza spezificha por ci che reverda le marcé dles esportaziuns dl’aziënda nöia IDM, denant EOS, mostra bele n valgügn efec.“ Mo por Kompatscher é „naturalmënter le gran mirit de chësc resultat dles impreses südtirolejes che á tut sö la desfida da esporté te marciá foresć cun n gran impëgn y n ince n valgügn prighi.“
I dac atuai é na rajiun de aprijamënt, mo al ne é nia na gaujia por sté chic sön chëstes prozentuales, deache dantadöt pro les esportaziuns ne é le travert nia ciamó gnü arjunt, insciö Kompatscher. „Le Venet por ejëmpl esportëia 13 iadi tan tröp co le Südtirol, mo á ma 10 iadi tan tröc abitanc.“ Chësc bun resultat dl 2015 dess insciö ince ester la basa por les impreses locales da jí inant sön le percurs dl esport. N trend che é ince jü inant ti pröms mëisc dl 2016 cun n aumënt dl 4,7 porcënt aladô de n’inrescida ASTAT. La proscima analisa di dac dl marcé südtirolej por ci che reverda les esportaziuns é preodü por setëmber.
rc
