Dala Junta: internet asvelt tles üties da munt, ok ai finanziamënc
Por porté l’internet asvelt ince tles üties da munt á la Provinzia aprové les condiziuns y les modalités d’azes ai contribuc por finanziamënc.
Slarié fora la rëi dla vëta leria sön döt le teritore südtirolej cun la poscibilité da s’anuzé dl internet asvelt ince tles zones da munt: chësc é un di obietifs prinzipai dla deliberaziun aproada incö, ai 09 d’agost, dala Junta provinziala por garantí le svilup economich, sozial y cultural sön döt le raiun dl Südtirol. En pröm vare é bele gnü fat tl 2015 cun la conzesciun ales üties da munt de contribuc cina al 80 porcënt dles spëises sostignides por porté l’internet asvelt ince ti raiuns alpins.
Incö (ai 9 d’agost) á la Junta provinziala fat n vare inant te chësta direziun aproan les modalités tecniches y les condiziuns de finanziamënt por la realisaziun dles linies dla vëta leria cina sön les üties da munt. „Chësta mosöra de finanziamënt reverda ma les strotöres privates, deache por les üties da munt de proprieté dla Provinzia vëgn i laurs de manutenziun finanziá dala man publica“, á splighé incö le presidënt dla Provinzia Arno Kompatscher. I finanziamënc provinziai pó avëi na soma mascimala de 2mile euro y les domandes mëss gní presentades cina ai 31 d’otober dl 2017 pro l’Area funzionala dl Turism.
„Chësc provedimënt é na mosöra de basa por düc i proprietars dles üties da munt, por che ai pois mët man cun i laurs bele ti proscims mëisc“, sotrissëia le presidënt Kompatscher y l’assessuria competënta Waltraud Deeg che dij inant: „Na curida sön döt le teritore cun l’internet asvelt ó ince dí avëi les medemes condiziuns de competitivité por düc, dantadöt ince por les üties da munt, che á n rode fondamental por l’acoliënza sö por munt, mo ince por garantí la segurëza alpina.“
rc
