Dala Junta: omnibus sön sanité y sozial, conflit de competënzes
La Provinzia jará a iudize dan la Curt costituzionala por ci che reverda la contestaziun de n valgügn articui dla lege omnibus sön sanité y sozial.
Tl mëis de ma â le Consëi provinziala aprové le dessëgn de lege omnibus presenté dal’assessuria Martha Stocker che á preodü na seria de mudaziuns por ci che reverda les leges provinziales ti seturs dla sanité, dles politiches soziales, dl laur, dl’avalianza dles oportunités y dl frabiché abitatif alisiré. Danter les novités prinzipales él les mosöres por ciafé plü personal sanitar, por mioré l’assistënza, renforzé le scombatimënt ales dependënzes, pité n sostëgn plü ampl ales porsones cun handicaps, otimisé la segurëza söl post de laur, garantí l’avalianza de oportunies, scemplifiché y armonisé les normatives.
Le Consëi di Ministri á indere costaté chestiuns de legitimité por ci che reverda trëi articui dla lege che dess jí cuntra desposiziuns y competënzes statales. Al se trata dl articul 1, che regolamentëia la formaziun spezifica por i doturs de medejina generala, dl articul 2, por ci che reverda i contrac a tëmp determiné da pert dl’Aziënda sanitara ai laureá „cun na cualificaziun profescionala compravada y particolara“, y l’articul 17 che á sciöche tematica la razionalisaziun y scemplificaziun di controi dles impreses.
Incö (ai 9 d’agost) á la Junta provinziala, sön proposta dl presidënt Arno Kompatscher, tut la dezijiun da jí a iudize dan la Curt costituzionala tl confrunt dla contestaziun da pert dl Stat, deache aladô dl arat dla Junta regolamentëia i articui competënzes autonomes dla Provinzia dl Südtirol. „I sun sigüsc da pié ia da na buna posiziun por defëne nosc provedimënt“, insciö Kompatscher.
rc
