Dala Junta: ok ala converjiun dles arees de sconanza Natöra 2000
Ara s’é stlüta jö incö la converjiun dles ultimes cinch zones dl Parch dl Stelvio da „sic de importanza comunitara“ a „zones speziales de conservaziun“.
En acordanza cun la diretiva europeica „Habitat“ dl má 1992 sön la flora y la fauna é i Stac comëmbri obliá da identifiché i raiuns de sconanza Natöra 2000 (raiuns de importanza comunitara SIC). Implü prevëiga la diretiva che chisc raiuns dess gní trasformá te 6 agn te „Raiuns de conservaziun speziai“ (ZSC). Le proiet de converjiun dles arees Natöra 200 da „sic de importanza comunitara“ a „zones speziales de conservaziun“ â metü man ai 14 de jügn dl 2016 cun la pröma converjiun de 35 arees da pert dla Junta y é gnü stlüt jö incö, ai 09 d’agost, cun la trasformaziun dles ultimes cin’arees dl Parch nazional dl Stelvio. „Cun la dezijiun da incö dla Junta provinziala él insciö gnü ademplí a dötes les ghiranzes da pert dl’Uniun europeica“, comentëia l’assessur competënt Richard Theiner.
La deliberaziun y la documentaziun gnará publicades online por 30 dis sön la plata dla Rëi Zivica y sará a desposiziun ince pro la Repartiziun provinziala Natöra, paesaje y svilup dl teritore, sciöche ince di Comuns interessá. Tratan chisc trënta dis sarál ince poscibl por i Comuns da fá propostes ala Junta provinziala.
rc
