S. Maria dai Ciüf: Plü controi dla polizia sön les strades dl Südtirol
Tratan la festa de S. Maria dai Ciüf dai 13 ai 15/08 fajará la polizia locala de plü controi sön les strades tl Südtirol tl contest dla campagna „No Credit“.
Les forzes dl ordin s’aspeta por chësc findledema, festa de Santa Maria dai Ciüf, n aumënt dl trafich, dantadöt da pert de motoziclisć y ghesć dl’area todëscia. Insciö gnarál controlé da indoman sabeda, 13 d'agost, cina en lönesc, ai 15 d’agost, te na manira costanta da pert dla polizia locala. La scomenciadia é öna dles mosöres dla campagna de sensibilisaziun „No Credit“ por plü segurëza sön les strades sostignüda dala Provinzia dl Südtirol y da chëra de Trënt en colaboraziun cun la polizia locala.
Les trates plü controlades da pert dles forzes dl ordin sará dantadöt chëres plü prigoroses cun la presënza plü alta de motoziclisć. Implü gnarál ince partí fora jorantins d’informaziun dla campagna, che é ince da ciafé da püch por ladin. L’assessur provinzial Florian Mussner rengraziëia la polizia locala, les forzes dl ordin y la zentrala viabilité por la buna colaboraziun che garantësc plü segurëza sön les strades. „Cun les aziuns de sensibilisaziun tl contest de No Credit orunse ti recordé a düc i autisć la responsabilité sön strada cun na velozité adatada ales condiziuns dl tëmp, dla strada, dl trafich y dla visibilité“, dij l’assessur por la mobilité y la rëi stradala Florian Mussner.
Dlungia i controi dla polizia locala y la spartiziun de jorantis á la campagna de "No Credit" ciamó trëi d’atri pilastri fondamentai. Por aumenté la segurëza di motoziclisć él insciö preodü, sciöche ince ti agn passá, n’ajornamënt costant dla segnaletica y dl’ilomiaziun dles strades, n ressanamënt dl asfalt danejé y l’istalaziun de tlandri dla strada nüs cun na proteziun aposta por i motoziclisć sön les trates dër prigoroses. Inant jará ince la colaboraziun cun le Safety Park.
rc
