Dala Junta: assëgn familiar +, sostëgn al tëmp te familia di peri
Dal pröm de setëmber inant ciafa i peri che laora tl setur privat y che se tol lëde por sté te familia l’assëgn familiar +.
N sostëgn finanziar ales families canche trami dui i geniturs laora, en ajunta al assëgn tradizional ales families, cun n’atenziun particolara al rode d’educaziun di peri che laora tl setur privat. Le assëgn familiar + nü sará varënt dal 1 de setëmber inant, la Junta provinziala á aprové incö la delibera che alda lapró. „I peri davagna sciöche valur mesan deplü co les umes y por chësc s’anüzi demanco dla poscibilité da jí en paternité. Cun chësta mosöra orun sostigní i peri che se tol na perioda de palsa dal laur por se dediché al’educaziun di mituns“, dij l’assessuria por les families Waltraud Deeg. Al é desmostré che na presënza plü dirëta di peri tla cuotidianité familiara dess avëi efec positifs sön le svilup emozional y cognitif di mituns y cun chësta mosöra dess la conziliaziun danter tëmps de laur y de familia gní sostignida ince por alisiré les umes, insciö Deeg. „I geniturs mëss avëi la liberté da podëi chirí fora y i speri che chësc proiet pois ester n impuls por aumenté la consapevolëza di peri da partí sö i laurs te familia te na forma plü valia“, á ajunté le presidënt Kompatscher.
Aladô dles statistiches plü atuales él tl Südtirol söporjö danter 600 y 700 les umes che tol la dezijiun da se licenzié tl pröm ann de vita di mituns, deache la maternité é massa cörta o deache ares ne ó nia ti surandé i mituns a d’atres strotöres, insciö Deeg. La deliberaziun da incö prevëiga plü avisa che i peri che laora tl setur privat pó damané do n contribut por na perioda che vá dai 2 ai 3 mëisc de palsa de paternité tratan le pröm ann y mez de vita di mituns: chi che ciafa 30 porcënt dl davagn podará damané 400 euro al mëis, chi che ne ciafa degöna idenité tratan la palsa ará le dërt da ciafé 800 euro, 600 euro al mëis é preodüs por chi che ciafa n’idenité dl 30 porcënt ma por na pert dla palsa. „Sostigní na cultura d’impresa plü acorta ai debojëgns dles families á efec positifs ince sön les aziëndes, cun na motivaziun plü alta di dependënc y cun assënzes che vëgn plü bases“, insciö Deeg.
Al pó fá domanda por l’assëgn familiar + düc chi che á les condiziuns por ciafé l’assëgn provinzial tradizional ( i mituns mëss ester nasciüs danter al 1 de jená dl 2016 y ai 31 de dezëmber dl 2018) y che á bele fat la domanda. Le contribut ajuntif ne podará nia gní paié fora sce le möt á bele anuzé de n sorvisc d’assistënza al’infanzia tratan la perioda te chëra che al vëgn fat domanda. Les domandes pó gní presentades dal 1 de setëmber inant pro l’Agenzia por le svilup sozial y econmich (ASSE) o ince pro i patronac. L’assëgn familiar + vëgn paié fora te un n iade cun n versamënt sön le cunt bancar dé dant por le paiamënt dl assëgn provinzial. Aladô de plü arac dess le numer di peri che fajará domanda por l’assëgn familiar nü ester söporjö de 600-700 peri por na spëisa complessiva de zirca 750 mile euro. Les ressurses economiches vëgn dal fonds regional por le sostëgn dles families y dl’ocupaziun che á ressurses ajuntives porvia dla retüda di paiamënc antizipá dles ponsiuns di aconsiadus regionai da denant.
rc
Galaria dales fotografies
