Dala Junta: aprové le ddl omnibus, mudaziuns te de plü seturs
La Junta provinziala á aprové incö le dessëgn de lege („omnibus“) che müda na seria de normes provinziales. Scemplificaziuns por zitadins y aziëndes.
Le ddl é formé da söporjö trënta articui y al ajornëia n valgönes leges provinziales de plü seturs – danter chisc l’ambiënt, la mobilité, la sanité, les cutes, l’economia, le laur –y porta para de plü alisiraziuns aministratives por zitadins y aziëndes. Le ddl nü é ince d’ütl por inserí n valgönes prezisaziuns nezesciares por garantí la sigurté de dërt, zënza messëi formulé na lege ad hoc, á recordé le presidënt dla Provinzia Arno Kompatscher. „Tl dagní sará l’obietif chël da presenté ma plü öna na lege omnibus al’ann, na chestiun che gnará ciamó debatüda tl Consëi provinzial.“ Do l’arat dl Consëi di Comuns á la Junta aprové le dessëgn de lege che passa sëgn al Consëi provinzial.
Danter i articui dl ddl aprové incö reverda dui la sanité: le pröm alza da un a trëi agn la dorada di contrac d’opera o di contrac de laur a tëmp determiné por profescionisćtl setur sanitar, cun l’obietif da alisiré le reperimënt di doturs tl Südtirol. I trëi agn podará ince gní anuzá dai interessá por mioré les conescënzes dl secundo lingaz. Le secundo articul reverda la ponüda dles bases por l’istituziun de n zënter de formaziun spezialistica de medejina generala, aciasada a Balsan tla Scora provinziala alta de sanité dla Claudiana.
Por ci che reverda la mobilité, le ddl omnibus ti dá ince la poscibilité de contribuc provinziai por n sostëgn maiú ales cooperatives y organisaziuns che pita n car-sharing, tl ciamp dl ambiënt él preodü danter l’ater la stipulaziun de convenziuns cun i sogec che á en gestiun les sëmenes por escursciuns (Comuns, assoziaziuns turistiches privac, CAI y AVS) por garantí les bunes condiziuns dla rëi dles sëmenes locales y por stlarí i dërc, dovëis y les responsabilités. L’articul conzed ince la conzesciun de contribuc. Tl setur dl’economia él preodü da n articul dl omnibus l’intervënt dla Provinzia por promöie l’assunziun y la formaziun de lerneri. Nia ma le finanziamënt ales impreses atocades, á spezifiché Kompatscher, mo ince les scomenciadies de sensbilisaziun y de formaziun por la segurëza söl laur y l’inserimënt di jogn. De plü alisiraziuns, mudaziuns tecniches y abrogaziuns reverda i prozedimënc aministratis, i ënc locai,l’ordinamënt di ofizi, le personal, l’agricoltöra, les forestes, la proteziun zivila, le frabiché abitatif y le patrimone.
rc
Galaria dales fotografies
