Tremoroz tl Zënter dla Talia, Proteziun zivila mëna na pröma scuadra
Solidarieté dal Südtirol ales zones atocades dal tremoroz tl Zënter dla Talia. Na pröma scuadra dla Proteziun Zivila é söl iade da Balsan.
Le tremoroz dër stërch che tla nöt á atoché na zona ampla tl Zënter dla Talia é ince na gaujia por les istituziuns südtirolejes da se ativé por daidé. „Te chisc momënc tragics sunse dër dlungia ala popolaziun y ales istituziuns atocades y la Provinzia dl Südtirol fajará döt le poscibl por mené i aiüc nezesciars“, á comenté le presidënt dla Provinzia Arno Kompatscher y l’assessur por la proteziun zivila Arnold Schuler. Bele da incö da doman él gnü ativé pro la sënta dl’Agenzia por la proteziun zivila a Balsan n Zënter de monitoraje. Implü á ince la Comisciun speziala dla Proteziun zivila taliana damané la desponibilité da mené na unité mobila y n’unité cinofila.
„I sun arjigná ca por vigni sort de intervënt y te 12 ores podun arjigné ca, sce al nes vëgn damané, na unité mobila che é buna da ti dé ospitalité y cura a zirca 250 porsones. Implü ún ince a desposiziun indöt 11 unités cinofiles“, sotlignëia le diretur dl’Agenzia por la proteziun zivila Rudolf Pollinger. Sön le iade tl vers dla zona dl tremoroz él bele na scuadra cun 4 porsones en rapresentanza dla Proteziun zivila provinziala, dla Crusc Blancia, dla Crusc Cocëna y di Stodafüch che á le compit da esploré la situaziun. Por düc chi che ó avëi notizies sön conoscënc o parënc presënc tles zones atocades dal tremoroz él poscibl da contaté le numer vërt 800 840 840 dl Departimënt dla Proteziun zivila de Roma.
rc
Galaria dales fotografies
