Dala Junta: finanziamënt dl program volumetrich dl Parch technologich
Cun a desposiziun i mesi finanziars dal fonds de rotaziun por l’archirida á la Junta tut la dezijiun incö da integré le program planivolumetrich dl NOI.
Le Parch tecnologich é n proiet de priorité primara dla Junta cun l'obietif da ti dé n impuls al’inovaziun dl’economia südtiroleja. La contlujiun di laurs de costruziun é preodüda por l’ann 2018. Ala fin de ma â la Junta bele aprové l’ampliamënt dl plann planivolumetrich dl parch tecnologich NOI cun le ressanamënt dl frabicat ex Speedline, les integraziuns pro la sënta zentrala y le modul D1 cun n investimënt de indöt 11,7 miliuns de euro. Insciö sarál sëgn ince poscibl da adoré les speres che vëgn a se le dé tres i laurs d’escavaziun, che podará gní adorades por realisé por ejëmpl magazins o laboratori.
La Junta provinziala á incö definí de conseguënza la modalité de finanziamënt de chisc intervënc: sciöche al spliga le presidënt dla Provinzia Arno Kompatscher "gnará i mesi nezesciars metüs a desposiziun dal fonds de rotaziun por l’archirida y le svilup". Por ti jí adincuntra ales esigënzes de inovaziun dles aziëndes y dles istituziuns d’archirida gnarál insciö metü a desposiziun 11,7 miliuns de euro tl contest dl plann planivolumetrich dl NOI. La soma gnará manajada dala BLS che é la sozieté che se crüzia dla realisaziun dles operes tl Parch tecnologich NOI.
La Provinzia sostëgn implü les aziëndes che fej archirida y svilup cun d’atres mosöres spezifiches: por ejëmpl tres i sorvisc dla sozieté IDM por aumenté la competitivité dles impreses y dl turism, tres n sostëgn de 500mile euro por l’assunziun de personal cualifiché te aziëndes dër spezialisades tl setur dl’archirida, cun mosöres por la creaziun de clusters y cun la costruziun de na rëi danter impreses locales por smendrí les dificoltés dles piceres impreses tl marcé internazional.
rc
