Dala Junta: 7 miliuns por l’internet asvelt tles zones produtives
La Junta provinziala á aprové incö la secunda bandida dl program FESR 2014-2020 che reverda la curida cun la fira otica tles zones produtives por 7 miliuns.
Le program operatif 2014-2020 dl Fonds europeich dl svilup regional FESR prevëiga danter l’ater da smendrí la desfarënzia digitala ti raiuns rurai y da aumenté la conetivité tres l’internet asvelt, sciöche ince preodü dal’Agenda digitala europeica. Chësc obietif vëgn metü tla pratica cun intervënc de curida dla banda leria (cun na velozité de almanco 100 Mbps) tles zones produtives (industruiales y artejanales) sön döt le teritore südtirolej tres l’istalaziun dla fira otica. Cina al 2020 él a desposiziun indöt 33 miliuns de euro, 50 porcënt da fonds UE tres le program FESR, 35 porcënt da fonds statai y 15 porcënt da fonds dla Provinzia.
Incö á la Junta provinziala aprové la secunda bandida dl FESR – cun n budget de 7 miliuns de euro – y á inciarié l’ofize Infrastrotöres por les telecomunicaziuns da presenté cina ai 7 de otober les propostes por realisé na rëi de conesciuns sön döt le teritore provinzial. „Le proiet de na rëi dla fira otica vá inant sön döt le teritore provinzial y cun chësc finanziamënt vëgnel colié les arees produtives al internet asvelt por aumenté la competitivité dles impreses locales“, sotlignëia l’assessuria provinziala por l’informatica Waltraud Deeg. Al se trata de n contribut important ince al documënt strategich „Südtirol digital 2020“ por n’Aministraziun publica plü coliada y capilara, insciö Deeg. Dötes les informaziuns nezescires söl program FESR nü é desponibles sön la plata internet: www.provincia.bz.it/fesr
rc
