La strada söl Ju de Frara é indô daverta, poscibl n spostamënt
Ara é indô daverta al trafich la strada che porta da Sëlva söl Ju de Frara. Por le dagní vëgnel ince ponsé a n spostamënt de na pert dla trassa.
I temporai da inier da sëra (29 d’agost) á atoché de plü zones dl Südtirol y á ince porté ala stlüta dla strada statala che porta da Sëlva söl Ju de Frara por gaujia de plü tomades de peres tla localité dl Mürfreit. „Bele tratan le danmisdé él sté poscibl da daurí indô la strada y chësc por merit di intervënc de prescia da pert di tecnics dl Sorvisc Strades Salten-Scilier che á liberé la strada da döt le material“, á splighé l’assessur provinzial Florian Mussner. Le presidënt dla Provinzia Arno Kompatscher y l’assessur Mussner á sotligné che la segurëza stradala é la pröma priorité y porchël é la chestiun ince gnüda tratada incö dala Junta provinziala. „La Repartiziun Sorvisc Strades y l’ofize Geologia dla Provinzia fajará ala fin dla sajiun da d’isté n intervënt de ressanamënt y de metüda en sigurté dla strada por indöt 400 metri tla localité Mürfreit“, á anunzié l’assessur por la viabilité sotlignan che al „gnará ince ejaminé la poscibilité da sposté n toch dla strada demez dai crëp.“
rc
