Mendranza ladina, incuntada cun i parlamentars
La proposta de lege por la mendranza ladina é stada tl zënter dles incuntades danter Kompatscher, Mussner, le deputat Alfreider y i parlamentars Fiano y Sanna.
I dui mëmbri dla pröma Comisciun por i afars costituzionai dla Ciamena di Deputac, Emanuele Fiano y Francesco Sanna, s’á incunté incö (31/08) a Balsan, adöm al deputat ladin Daniel Alfreider, cun le presidënt dla Provinzia Arno Kompatscher y l’assessur ladin Florian Mussner. Sanna é ince le reladú dla proposta de lege costituzionala sön la sconanza dla mendranza ladina y propi chësta proposta de lege é stada tl zënter dles incuntades cun le presidënt Kompatscher y l’assessur Mussner.
La proposta de lege costituzionala á bele ciafé l’arat positif da pert dl Consëi regional y di dui Consëis provinziai de Balsan y Trënt y á l’obietif da amplié la rapresentanza dl grup linguistich ladin nia ma tla Junta provinziala, cun la previjiun de n terzo vizepresidënt, mo ince tles inciaries plü altes di ënc locai mesans, di ënc publics de relevanza provinziala, tla seziun autonoma dl TAR y tla Comisciun di Dodesc. Sëgn mëss le dessëgn de lege afronté l’iter parlamentar.
Le presidënt Kompatscher á splighé che „al s’informëia cun costanza sön le percurs dl dessëgn de lege cun l’aodanza che al pois ciafé na contlujiun positiva cun respostes asveltes, ince deache l’aprovaziun de na lege costituzionala de mudaziun dl Statut d’Autonomia ne é nia n percurs saurí.“ Implü á le presidënt sotligné che „la garanzia de n’avalianzia tres plü reala de düc i grups linguistics dl Südtirol é öna dles priorités dl’agenda politica dla Junta provinziala, che ciafa ince süa fondamënta tl Statut instëss“, insciö Kompatscher.
Denant co s’incunté cun le presidënt dla Provinzia á la delegaziun parlamentara ince albü na sentada cun l’assessur ladin Florian Mussner por s’acordé sön le percurs legislatif. „Dër positif é che le dessëgn de lege atual prevëiga l’ampliamënt di dërc di ladins y che contëgn de plü punc che vëgn bele ghirá da plü tëmp, sciöche por ejëmpl na maiú rapresentanza dl grup linguistich ladin tles istituziuns plü altes provinzialaes, di ënc locai y tles istituziuns iuridiches“, insciö l’assessur Mussner che á sotligné la buna colaboraziun di rapresentanc ladins danter Parliamënt, Regiun y Provinzies.
rc
Galaria dales fotografies
