Ann de scora nü: I assessurs ti aoda n bun start a scolars y maestri
Do la palsa da d’isté mët l’ann de scora indô man en lönesc ai 05/09. I assessurs por la scora Tommasini, Mussner y Achammer ti aoda a düc n ann de suzes.
I direturs dles scores y dles scolines á bele inauguré l’ann scolastich nü, les prömes sentades de preparaziun dles ativités didatiches é bele jüdes a piz tles ultimes edemes y tles scores vëgnel fat i ultims laurs por arjigné ca les classes. Da en lönesc él ince l’ann de scora y de scolina che mët man por düc i scolars y scolares y por düc i mituns y les mitans dles scolines.
Por le vizepresidënt y assessur por la scora taliana Christian Tommasini é le start scolastich inann n avenimënt particolar „cun n pensier che ti vá ai scolars y studënc dles zones atocades dal tremoroz ai 24 d’agost, por chi che podëi jí a scora é deventé n travert important, deache al fej pordërt pert dla vita da vigni de y dla normalité che é gnüda destrüda dal tremoroz.“ Implü sotlignëia Tommasini che „la scora desmostra insciö so rode fondamental, nia ma sciöche elemënt ajuntif mo ince sciöche basa por le svilup sozial y personal de nüsc mituns y de nostes mitans“.
L’assessur por la scora ladina Florian Mussner sotlignëia en ocajiun dl scomenciamënt dl ann scolastich nü l’importanza de n bun funzionamënt dla rëi danter le monn scolastich, geniturs y cun dötes les istituziuns de formaziun. „Dantadöt cun n’odlada ales sfidades nöies, che reverda l’integraziun de mituns migranc o l’adoranza di media nüs, mo ince por ci che reverda la trasmisciun de nostes cultures, nosta tradiziun y les rujenedes él important che le monn dla scora y dles families laores adöm, por ti trasmët ales generaziuns nöies i valurs dla democrazia, de na convivënza pazifica y dl’azetanza“, insciö Mussner, che ti aoda a düc i scolars y a düc chi che laora tl setur dla formaziun n bun start y n ann scolastich plëgn de sodesfaziuns. Tles scolines dles localités ladines él scrit ite por l’ann 2016/17 indöt 667 mituns y mitans, tles scores elementares él indöt 1211 i scolars scric ite pro le proscim ann de scora, 716 tles scores mesanes y 526 tles scores altes.
L’assessur por la scora todëscia Philipp Achammer recorda por l’ocajiun che „la formaziun á le compit da ti pité perspetives a nüsc mituns y a nüsc jogn, por che ai pois ti ciaré cun otimism al dagní. Nia les valutaziuns ne dess ester tl zënter dla scora, mo l’arjunta plü importanta é che i scolars impares da se tó les responsabilités por resté coriusc na vita initira y tres interessá a cosses nöies“, insciö Achammer. A düc i scolars, scolares, direturs y direturies, maestri y maestres y a döt le personal didatich y aministratif ti aoda i trëi assessurs Tommasini, Mussner y Achammer n bun scomenciamënt dl ann scolastich nü y n percurs cun tröp suzes y tröpes sodesfaziuns.
rc
