Dala Junta: De dl’Autonomia, bilanz positif
Do le convëgn organisé inier tl Ciastel de Sigmundskron él le presidënt Arno Kompatscher che fej n bilanz dl’incuntada cun i ministri Gentiloni y Kurz.
N convëgn storich che á inrescí les vijiuns desvalies söl valur dl’Acordanza de Paris, la presënza importanta di Ministri por i afars esters de Talia y Austria, Gentiloni y Kurz, i messaji di presidënc da denant Napolitano y Fischer: le bilanz dl De dl’autonomia é do l’arat dla Junta provinziala positif, cun le presidënt dla Provinzia Arno Kompatscher che é contënt por l’organisaziun dl De dl’Autonomia sté inier (ai 5 de setëmber) tl Ciastel de Sigmundskron. „Al ne é nia sté n momënt de autozelebraziun, mo al é sté indere l’ocajiun da analisé le tëmp passé mo ince da se arjigné ca le miú che ara vá por nosc dagní“, á sotligné le presidënt Arno Kompatscher. Implü á le presidënt dla Provinzia dit che „al é fondamental che les generaziuns jones mantëgnes la memoria de chësc percurs dal 1946 inant, che á porté, ince por merit de tröpes porsones competëntes ince presëntes inier, a na gestiun autonoma y locala dl Südtirol.
Ince la presënza di Ministri por i afars ester Gentiloni y Kurz, sciöche ince i videomessaji di presidënc da denant Napolitano y Fischer, é stá dër importanc da chësc punt de odüda, insciö Kompatscher che á sotligné che „da öna na pert él gnü sotligné la funziun de sconanza da pert de Viena y dal’atra pert la forza dl implant autonomistich che, por merit dla tlausola de sconanza, ne gnará nia metü en discusciun dala reforma costituzionala.“ Ciaran al dagní recorda le presidënt dla Provinzia che „la costruziun dl’autonomia ne é nia rovada a piz, deache ara mëss gní ajornada por resté atuala cun i tëmps y cun les evoluziuns che fej pert de düc i seturs dla sozieté. Por chësc él important da jí inant y da se confronté sön la tematica, ince pian da posiziuns nia medemes por rové a soluziuns che ti consënt al Südtirol da ne resté nia ma n ejëmpl positif de convivënza pazifica, mo ince por s’amplié y se consolidé sciöche na picera Europa tl’Europa.“
rc
