Dala Junta: zirconvalaziun de Balsan, coliamënt cun le zënter dla cité
Stüde de fatibilité por n coliamënt nü cun le zënter dla cité y cun l'ampliamënt dla galaria y cun na colaboraziun nöia danter Provinzia, Comun y A22.
Le proiet dla zirconvalaziun de Balsan é un di proiec plü importanc dla Provinzia por i proscims agn. Ince por merit dl finanziamënt preodü dala A22 gnará la realisaziun dl proiet despartida te cater loc: le pröm reverda la galaria dl Virgolo cun n investimënt de presciapüch 200 miliuns de euro, le secundo lot indere prevëiga la costruziun de na galaria sot tera de Via Einstein tla zona industriala dla cité cun n investimënt de 26 miliuns de euro. Por le terzo lot él preodü la realisaziun de n coliamënt danter via Einstein cina la superstrada MeBo danter Balsan y Maran cun na spëisa de 55 miliuns de euro. Le cuarto lot, che ne fej nia pert dl cofinanziamënt dal A22, gnará a se le dé cun n investimënt de 87,7 miliuns de euro y reverda la galaria dal’entrada de Balsan cina l’entrada tla Val dl Sarenthein.
„Les simulaziuns á desmostré che la zirconvalaziun de Balsan ne é nia ma ütla por smendrí le trafich tl zënter dla cité, mo ara dëida dantadöt da sposté le trafich aldinfora dla cité, olache al gnará realisé spo ince plazes da parchené por i auti“, á splighé le vizepresidënt dla Junta provinziala Christian Tommasini. La Junta provinziala á aprové incö (ai 13 de setëmber) n stüde de fatibilité por ci che reverda le pröm lot dla varianta y le conzet de coliamënt cun le capolüch. La tematica gnará afrontada tratan n’incuntada informativa cun la Junta comunala de Balsan ai 20 de setëmber, a chëra che al tolará pert i assessurs por i Christian Tommasini y Florian Mussner. Implü él ince gnü istituí n organ de direziun cun rapresentanc dla Provinzia (Departimënt viabilité y mobilité, Ofize tecnich strades Zënter/sud, Ofize Planificaziun teritoriala, Ofize valutaziun impat ambiental), dl Comun (Ofize Infrastrotöres y Ofize Mobilité) y dl’Autostrada dl Prener che ará ince le compit da acompagné döta la fasa operativa. „Chësc é ince le sëgn de na colaboraziun positiva danter les istituziuns“, á stlüt jö Christian Tommasini.
rc
