Dala Junta: regolamënt de transiziun por le bonus de cubatöra
I proiec aprová por la fin dll 2016 podará s’anuzé dl 'bonus energia' sce i laurs metará man cina ai 31 de dezëmber 2017.
La Junta provinziala á aprové incö, sön scomenciadia dl assessur provinzial Richard Theiner, l’introduziun de n regolamënt de transiziun por le bonus de cubatöra, ince tlamé 'bonus energia'. L’obietif de chësta mosöra é chël da evité che les dites de costruziun mëtes man cun la prozedöra de „scomenciamënt di laurs“ por la costruziun de na frabica CiasaClimaA ma cun le fin da ne perd nia le bonus cubatöra che sará ciamó da ciafé cina la fin dl 2016. „L’oblianza da mët man cun la fasa de costruziun é gnüda spostada de un n ann“, á splighé le vizepresidënt Christian Tommasini.
Atualmënter prevëiga les desposiziuns normatives che le bonus energetich vëgnes apliché sce le proiet ciafa la conzesciun cina l’ann 2016, mo cun l’oblianza che ince i laurs mëtes man cun la data dla conzesciun, chësc oress dí cun la fin dl ann 2016. I proiec de costruziun aprová dal pröm de jená dl 2017 ne á insciö nia plü le dërt al bonus de cubatöra ince sce i frabicac vëgn fac sö aladô dl standard „CiasaClimaA“, deache cun la data de al pröm de jená dl 2017 sará la CiasaClima A le standard minim. Zënza n regolamënt de transiziun podessel nasc la chestiun che les impreses mëtes man cun i laurs ma te na manira formala, zënza programé te na manira efetiva i laurs de costruziun por i proscims agn. Incö á insciö la Junta provinziala stabilí che les dites messará mët man cun i laurs de costruziun cina ai 31 de dezëmber dl 2017. Le proiet mëss insciö ciafé la conzesciun cina l’ann 2016, mo por s’anuzé dl bonus cubatöra él nezesciar che i laurs mëtes man cina la fin dl ann 2017. „Chësc regolamënt ti vá ince adincuntra ales aziëndes, insciö ti él gnü conzedü ciamó n ann implü por atué les conzesciuns. Ince deache le bonus energia é öna dles mosöres che ti á dé la poscibilité al setur dles costruziuns da jí tl vers de n mioramënt dla situaziun economica“, á splighé le presidënt dla Provinzia Arno Kompatscher. Contënt dla soluziun ciafada ince l’assessur Richard Theiner. „L’obietif ê chël da promöié n svilup ecologich y sostenibl y le bonus cubatöra nes á impormetü da jí te chësta direziun. Tröpes impreses á tut la dezijiun da fá sö ciases aladô dl standard „CiasaClimaA“ ince por merit dl bonus de cubatöra“, insciö Theiner.
rc
