Surandada dles crusc de merit: Volontariat fondamënta dla sozieté
46 personalités é gnüdes premiades inier sön Ciastel Tirol cun les crusc de merit dl Land Tirol surandades dai presidënc Kompatscher y Platter.
„L’impëgn volontar y debann é öna dles fondamëntes che coliëia nosta sozieté y che garantësc ince n bun funzionamënt tl dagní“, cun chëstes parores á le presidënt dla Provinzia Arno Kompatscher onoré inier ai 18 de setëmber sön Ciastel Tirol 46 personalités dl Tirol dl Nord, dl Est y dl Süd cun la surandada dles crusc de merit dl Land Tirol. Le presidënt dla Provinzia Arno Kompatscher á sotligné por l'ocajiun l’importanza da avëi ejëmpli por la sozieté, dantadöt aldedaincö cun tröc valurs che vëgn metüs en discusciun. „Incö vëgnel premié ëres y ëi che á contribuí te na manira speziala al svilup de nosta sozieté y che á lascé mersces positives. Ëres y ëi che é sëgn de gragn ejëmpli y porsones straordinares“, á dit le presidënt Kompatscher.
La surandada dles crusc de merit é gnüda fata dal presidënt dla Provinzia Kompatscher adöm cun le presidënt dl Tirol Günther Platter en presënza de plü rapresentanc dles Juntes dl Tirol y dl Südtirol. Le presidënt dla Provinzia Platter á sotligné tratan la manifestaziun che les crusc de merit é n sëgn de reconoscimënt por le laur volontar: „I premiá ne miorëia nia ma la cualité de vita de nüsc raiuns mo é ince de gragn ejëmpli por nosta jonëza“, insciö Platter. Nü porsones premiades vëgn ince dal Südtirol. Al se trata de Ralf Dejaco, Agnes Egger Andergassen, Nikolaus Fischnaller, Ulrike Kindl, Maria Mayr Kußtatscher, Günter Plaikner, Karl Preindl, Ida Rabensteiner Pseier y Herbert Thaler.
Salvadus dla vita y volontars jogn
Tl contest dla surandada dles crusc de merit tl Ciastel Tirol él inann ince gnü assegné por le pröm iade tl Südtiol atestac de reconoscimënt a salvadusc dla vita. Le presidënt Arno Kompatscher ti á surandé a Rachid Zaroual chësc reconscimënt, deache al á salvé la vita a n’ëra che manaciâ da jí sot dan da n ann tl rü d’Isarch a Balsan. Rachid Zaroual é nasciü tl 1984 a Marrakesch tl Maroco, tl 2014 él rové tla Talia y á ciafé n laur sëgn tres le proiet „Alba“. Cun l’atestat de reconscimënt por avëi salvé la vita a valgügn gnarál ince ti proscims agn premié porsones che á mostré coraje te situaziuns prigorores.
Daldöt na novité é indere la surandada de atestac de merit ai volontars jogn che é gnüda a se le dé por le pröm iade tl Südtirol: i atestac de merit por i volontars jogn é n’idea che é nasciüda dal’organisaziun „Südtiroler Jugendring“ (SJR). „L’obietif é chël da premié l’impëgn plurianual y volontar de jones y jogn sciöche ince le laur por mioré les condiziuns generales por les uniuns volontares“, á spezifiché le presidënt Komaptscher. N recort particolar cun n menüt de chît é jü en chësta ocajiun al presidënt da denant dl Jugendring Michael Peer che é mort da püch y é ince sté le manajadú dl’organisaziun por tröc agn.
La crusc de merit
La crusc de merit vëgn surandada dal Land Tirol adöm al Südtirol a nia plü co 48 porsones al ann. Adöm cun l’anel y l’emblema é la crusc de merit la terza onoreficënza d’onur dl Land Tirol. La surandada vëgn organisada n ann a Desproch y l’ater ann spo tl Ciastel Tirol.
rc
Galaria dales fotografies
