Laur y familia, incuntada danter geniturs, Deeg y Achammer
Le grup „Scomenciadia Geniturs“ s’á incunté cun i assessurs Achammer y Deeg por rajoné dl mioramënt dla conziliaziun danter laur y familia.
Plü co setcënt firmes él gnü coiü adöm tratan l’isté por ti dé plü visibilité a öna dles chestiuns plü importantes por la vita dles families: al se trata dla conziliaziun danter le laur y la familia cun n’atenziun particolara ales tematiches sciöche la scora, i orars y l’assistënza da d’isté. I coordinadus dla scomenciadia di geniturs por la conziliaziun danter familia y laur tl Südtirol, Elisabeth Vallazza y Michael Kerschbaumer, s’á incunté dan da püch cun l’assessur Philipp Achammer y l’assessuria Waltraud Deeg por traté chësta tematica. I assessurs á sotligné che „les segnalaziuns che vëgn dales families é de gran valüta deache ares dëida da mioré y adaté l’oferta ales esigënzes“.
„Les mudaziuns soziales y demografiches – á splighé Vallazza y Kerschbaumer – porta para che la conziliaziun de familia y laur é öna dles problematiches plü sintides dai geniturs che lar y che le sostëgn dla rëi familiara ne é nia plü tan sterch sciöche denant. I sorvisc por la pröma infanzia cina che i mituns á trëi agn garantësc na buna curida, mo i problems nasc spo cun la scolina y la scora: vacanzes da d’isté y tratan l’ann y dantadöt la mancianza de n’assistënza domisde aldinfora dles cités y che é öna dles chestiuns plü zities“. La ghiranza plü grana dla scomenciadia é insciö n’armonisaziun di orars de scora y de scolina cun n ampliamënt dles ores che reverda dantadöt les scolines.
L’assessur Philipp Achammer mët le focus ince sön la „nezescité da smendrí ince le laur dles colaboradësses pedagogiches tles scolines y i fej la proposta da mët da jí n dialogh danter dötes les perts interessades por ciafé na soluziun che pois jí bun sides por ci che reverda les esigënzes di insegnanc co ince de chëres di geniturs.“ L’assessuria Deeg á sotligné che „la conziliaziun é n prozes che mëss se svilupé vara por vare y da chësc punt de odüda é la sensibilisaziun un di faturs prinzipai.“
rc
