Presentaziun dla VI ediziun dla Fiera dla Formaziun „Futurum“
Le vizepresidënt Tommasini y i assessurs Mussner y Achammer á presenté incö le program dla Fiera dla Formaziun Futurum dai 29/09 al 01/10 a Balsan.
„Ciafa tüa strada“: chësc é le moto dla sesta ediziun dla Fiera dla Formaziun Futurum 2016 che gnará tignida dai 29 de setëmber al 01 de otober tla sënta dla Fiera da Balsan y che pita na suraodüda sön les propostes formatives dl monn dles scores altes y profescionales, dla formaziun profescionala, dles Universités tl Südtirol y tles vijinanzes sciöche ince dles profesciuns plü praticades tl Südtirol. Al gnará pité na suraodüda sön i percursc formatifs y profescionai dales scores altes inant cina ala formaziun universitara y permanënta sön le laur.
Le program detaié dla Fiera é gnü presenté incö, ai 22 de setëmber, te na conferënza stampa dai assessurs por l’istruziun Christian Tommasini, Florian Mussner y Philipp Achammer, aödm cun la direturia dla Repartiziun Dërt al Stüde Rolanda Tschugguel y le vizepresidënt dl LVH-APA Martin Haller. Le vizepresidënt Tommasini á recordé che l’obietif dla Futurm „é chël da evidenzié la gran importanza dla formaziun por nosta sozieté y por nosta vita: n percurs de formaziun é la basa por le svilup personal y profescional“. L’assessur por la scora ladina Florian Mussner á dit che „la formaziun é la tle por le dagní cun la Fiera Futurum che é na buna ocajiun d’informaziun por scolars, studënc y geniturs por odëi la gran varieté dl’oferta scolastica te nosta Provinzia.“ L’assessur Mussner á ince sotligné la gran crëta cha al á tl sistem scolastich: „La tle por le dagní é te bunes mans“. Ince l’assessur por la scora todëscia Philipp Achammer á sotligné che „le fin dla Futurum é da presenté n’oferta ampla por daidé i jogn y sü geniturs da tó les dezijiuns por ci che reverda le percurs formatif y pita ince na suraodüda sön la formaziun permanënta che é nezesciara por döta la vita.“
La Fiera dla Formaziun „Futurum“ é ponsada dantadöt por i scolars y les scolares dla scora mesana y alta, mo ince dles scores profescionales por s’informé sön les poscibilités desvalies che le monn dl’educaziun pita aldedaincö. Tratan la Fiera ti gnarál dé n’atenziun particolara ala scomenciadia MINT (ai 30 de setëmber) che á sciöche obietif la promoziun dles materies tecniches y scientifiches sciöche la matematica, l’informatica, les sciënzes naturales y la tecnica. Martin Haller, vize-presidënt dl’assoziaziun di artejans dl Südtirol Lvh-Apa á presenté le campionat statal dles profesciuns „Worldskills Italy“ che é tl medemo momënt ince la cualificaziun ai campionac mondiai dles profesciuns a Abu Dhabi tl 2017 cun indöt 28 profesciuns ala pert. Chësta finestra söl monn dl laur reverda de plü seturs dal’artejanat, al’agricoltöra, le turism cina ala gastronomia. Le campionat „Worldskills Italy“ gnará tigní dai 29 de setëmber al 01 de otober tla sënta dla Fiera Futurm cun indöt 5000 partezipanc che se á bele scrit ite.
La Fiera Futurum vëgn organisada dala Ofize Promoziun dl Stüde, Université y Inrescida Scientifica adöm cun i Departimënc dla scora todëscia, taliana y ladina, dai Ofizi Formaziun permanënta dla Cultura todëscia y taliana, dala Repartiziun Laur, sciöche ince dal LVH-APA y dala Fiera Balsan. La Futurum 2014 é gnüda vijitada da 19.500 vijitadus. 244 sará les scores partezipantes, 24 les Universités y 18 i Ofizi y Partners dla scomenciadia.
Por plü informaziuns: www.futurum.it
rc
Galaria dales fotografies
