Bons por cursc de ladin y talian
Porsones zënza n contrat de laur pó s’anuzé de bons de 250 euro por jí a cursc de ladin y talian.
L’Ofize Formaziun permanënta dla Repartiziun Cultura todëscia mët a desposiziun n bon por porsones zënza n contrat de laur por imparé le ladin o le talian. „Chësta oferta é ponsada por chi che é atualmënter zënza laur y ó investí te sües conescënzes linguistiches“, spliga Hubert Bertoluzza dl Ofize Formaziun permanënta. Le contribut é de 250 euro y che corespogn al cost dl curs y ince dl material didatich. Chësta mosöra de sostëgn é gnüda realisada por merit dla colaboraziun danter l’Ofize Formaziun permanënta y le Sorvisc Laur. Plü informaziuns pón ciafé pro i zëntri de coordinamënt dl laur o pro l’Ofize Formaziun permanënta (Tel. 0471 413394, E-Mail sonja.logiudice@provinz.bz.it).
rc
