Assessur Mussner: „La rujeneda renforzëia l’identité personala“
En ocajiun dl De europeich di Lingac sotlignëia l’assessur Mussner l’importanza dla rujeneda dl’uma y dl plurilinguism. Fiera linguistica di scolars a La Ila.
Por sotligné l’importanza dl’imparé i lingac desvalies á le Consëi d’Europa istituí tl 2001 le De europeich di Lingac che vëgn festejé vigni ann ai 26 de setëmber. Cun tröpes scomenciaides y proiec tl contest dla zelebraziun vëgn indöt 800 miliuns de porsones motivades da odëi la richëza tl’imparé rujenedes nöies.
La cura dla rujeneda dl’uma, mo ince la promoziun dl plurilinguism é dui pilastri fondamentai dl orientamënt didatich dl monn dla scora y dl'educaziun tles valades ladines. „Sconé y sostigní na rujeneda de mendranza é por le svilup de nosta sozieté de gran importanza, deache ma insciö pó nosta arpejun culturala y linguistica ladina se svilupé inant“, dij l’assessur por la scora ladina Florian Mussner. Por merit dl plurilinguim él implü poscibl da imparé da conësce atres cultures y raiuns, da renforzé la comunité europeica y da ciafé soluziuns pazifiches ai conflic, insciö Mussner. En ajunta porta les conescënzes linguistiches ince para de plü vantaji por le singul sciöche por ejëmpl söl marcé dl laur. „Ince por l’integraziun di zitadins che vëgn da perts desvalies dl monn él n’oblianza che ai impares y proes da capí les rujenedes y la cultura dl paisc ospitant“, sotlignëia Mussner.
Na scomenciadia particolara por le De europeich di Lingac vëgn organisada inann dala scora alta de La Ila. Te de plü staziuns presentará insciö les scolares y i scolars te na Mostra di lingac tröpes curiosités y particolarités di sis lingac che vëgn insigná tla scora alta. Al se trata di lingac ladin, todësch, talian, inglesc, franzesc y latin. „Indöt 37 é le numer scolars y scolares che tól pert al proiet y nosc obietif é da mostré che te scora ne vëgnel nia ma insigné n lingaz, mo che al é n iade te n ater monn rich de cosses interessantes, da personalités a scriturs, tradiziuns, formes d’espresciun y ince spezialités culinaries, ince pro ti mostré ai scolars la richëza di lingac“, á dit la coordinadëssa dl proiet Magdalena Lerchegger. La Mostra di lingac gnará daurida
en lönesc, ai 26 de setëmber dl 2016,
dales 17:00
tl zënter dles scores altes da La Ila
strada Pedraces 11
en presënza dl assessur por la scora ladina Florian Mussne y restará ince daverta en mertesc (8.30-15.30), en mercui (8.30-12.50) cina la jöbia (8.30-12.50). La scomenciadia é ince da ciafé sön la plata internet ofiziala istituida por l’ocajiun dl Consëi d’Europa.
Cun indöt 225 rujenedes „autoctones“ á l’Europa na gran varieté y n’arpejiun linguistica dër ampla. Le Consëi d’Europa sostëgn la promoziun dl plurilinguim te döta l’Europa cun l’obetif da renforzé la varieté linguistica y la comprenjiun culturala, deache i lingac é n elemënt fondamental dl’arpejiun culturala europeica.
rc
Galaria dales fotografies
