Les dezijiuns prinzipales dla Junta provinziala de incö 27 de setëmber
Finanziamënt dl’eletrificaziun dla linia dla Venosta, Brennercom, recuperada di materiai, rondel nü a Falzes y d’atres dezijiuns é gnüdes tutes dala Junta incö.
Öna dles dezijiuns prinzipales che la Junta provinziala á tut incö, ai 27 de setëmber, te süa sentada edemala é stada l’aprovaziun dl plann de despartiziun nü de Brennercom: l’operaziun prevëiga la spartiziun te n’aziënda nöia Brennercom Spa por ci che reverda l’infrastrotöra dla telecomunicaziun y la nasciüda de na secunda sozieté, daldöt publica de proprieté de Provinzia (83%), Selfin (8,2%), ASM Porsenú (3,4%) y Autostrada dl Prener (5,3%). Chësta sozieté nöia se fistidiará dla rëi y dla promoziun dl internet asvelt. „I ún ciafé n’acordanza por despartí dal’ativité economica dl’impreja le setur che reverda la rëi dla banda leria y chësc é n vare fondamental deache al garantësc l’interes publich d’azes a internet sön döt le teritore, sciöche preodü dal’Agenda digitala europeica“, á sotligné le presidënt dla Provinzia Arno Kompatscher. Dötadöm le patrimone netto dla sozieté sará de 19,76 miliuns de euro, despartis te imobilisaziuns imateriales (contrac, lizënzes, yii) materiai (les cater alzades tla sënta a Balsan) y les desponibilité de ressurses finanziares da investí de 7,5 miliuns de euro. Indoman messará i sozi de Brennercom ciamó ratifiché le proiet de spartiziun.
N’atra dezijiun importanta é stada l’aprovaziun dl regolamënt cun les diretives por la recuperdada de materiai da costruziun y demoliziun. Regolamentada danü te chësc setur vëgn ince l’adoranza de chisc materiai te n secundo momënt. „L’obietif de chësta deziijun é chël da recuperé y reanuzé le plü che ara vá i materiai da demoliziun por sconé l’ambiënt y sparagné ressurses“, sotlignëia l’assessur competënt Richard Theiner. Tl Südtirol reverda la produziun de materiai da demoliziun söporjö 900mile tonelades al’ann. Les diretives regolamentëia la recuperada di materai da costruziun y demoliziun, chël ó dí la produziun de materiai ti cantiers (materiai d’escavaziun, de demoliziun de operes y de strades). Implü él ince gnü definí la cualité di materai che podará gní reanuzá danter l’ater por asfalté strades, por implí loces, por la costruziun de ciamps dl sport, operes de proteziun, trus dla roda yii.
Al sará n investimënt de indöt 66,5 miliuns de euro chël dla eletrificaziun dla linia dles ferates dla Val Venosta. La Junta provinziala á autorisé incö la stipulaziun de n contrat por n imprëst da dé zoruch te diesc agn de 26 miliuns de euro cun la Banca por i investimënc europeica. En ajunta á la Junta ince deliberé de investí 22,5 miliuns de euro por le 2019 y le 2020 tres la Repartiziun Mobilité por porté a piz le proiet de eletrificaziun dla linia dla Vel Venosta. „Cun l’eletrificaziun ne sarál nia ma poscibl da mioré la capazité dla linia, mo ince da aumenté le numer di iadi direc cina Balsan“, á splighé l’assessur por la mobilité Florian Mussner.
La Junta provinziala á definí incö sön proposta dl assessur provinzial Florian Musner les carateristiches tecniches dl intervënt de ressanamënt dla strada provinziala por le Ju dl Rombo. Preodü él che al gnará amplié la strada tla localité "Stulles" por 470 metri por aumenté la segurëza y la viabilité, implü él ince programé da ressané i mürs de sostëgn, da consolidé les alzades sön le perts y da asfalté la strada danü. I cosć dl intervënt sará de söporjö 995mile euro.
N’atra dezijiun dla Junta provinziala é stada l’aprovaziun dla costruziun de n rondel nü tl zënter de Falzes tla Val de Puster. Le rondel nü gnará realisé pro l’incrujiada dla strada prinzipala che porta da Bornech a Falzes cun les strades comunales „Via Michael Pacher/zona sportiva“. Le proiet prevëiga n investimënt de 393mile euro cun na larghëza mascimala dl rondel de 28 metri sciöche scrit dant dales normes provinziales.
Incö él ince gnü ajorné i contribuc fisc di sorvisc de linia tles cités y aldinfora dles cités. La soma di contribuc vëgn calcolada sön la basa di cosć standard (personal, benzin, inflaziun) por veicul pro chilometer. Sön proposta dl assessur Mussner á la Junta insciö ajorné i cosć standard reconesciüs por le 2017 y che sará de 2,6298 euro por chilometer por i sorvisc de linia aldinfora dles cités (+0,5%) y 2,8897 euro por chilometer por les lines tles cités (+1%). Implü él ince gnü definí i cosć standard dles döes infrastrotöres feroviares manajades dala SAD: por le 2017 ciafa insciö la SAD por le sorvisc sön la linia Maran Malles n contribut de 7,36 euro por chilometer y por i sorvisc sön les linies de RFI é indere le contribut de 6,62 euro por chilometer.
Sön proposta dl assessur por le patrimone Christian Tommasini á la Junta provinziala ince aprové incö la prorogaziun dla conzesciun al Comun da Balsan dl parch di Capuziner a Balsan cina l’ann 2039. „Insciö sarál ince poscibl da fá de plü intervënc, danter l’ater por ci che reverda l’ilominaziun y la mioraziun dles infrastrotöres y dles sperses vërdes, y che porta ince para plü vantaji por i zitadins y abitanc che vir a Balsan y tles vijinanzes“, spliga Tommasini.
rc
