Setur por les families: direturia y plata internet nöia
Döes novités por le setur dla familia: Gudrun Schmid é la direturia nöia dl’Agenzia y implü é la plata internet gnüda ajornada.
Le proiet de renovamënt dla presënza söl web dla Provinzia de Balsan reverda ince le setur dles families de Südtirol. Ara é online da incö danmisde (ai 28 de setëmber) la plata internet nöia (por talian y todësch) che reverda la familia sot a www.provincia.bz.it/famiglia y contëgn dötes les informaziuns pratiches y consëis d’ütl. „Cina incö ê les tematiches dla familia da ciafé sön de plü plates internet dla Provinzia, cun chësc portal ún coiü adöm döta la materia te na manira scëmpla, direta y azessibla por düc“: Le portal nü ne é nia ma dediché ales families, mo ince ales organisaziuns che á da nen fá cun chësc argomënt zentral por la sozieté. „Les plates é gnüdes realisades te na manira azessibla y saurida da anuzé dantadöt por les families“, á ajunté Deeg.
Les informaziuns contignüdes al intern dla plata internet www.provincia.bz.it/famiglia é partides sö por tematiches y seziuns che reverda les fases desvalies dla vita familiara: dai pers che aspeta mituns, cina al’assistënza por viadus al adolescënza y sfidades che mëss gní afrontades dai geniturs. Informaziuns d’ütl é ince da ciafé por ci che reverda le sostëgn economich y ince psicologich te momënc de dificolté tles strotöres desvalies dla provinzia. Sciöche dötes les atres plates internet á ince la plata internet nöia dedicada ala Provinzia n motor d’archirida efiziënt tres le sistem Google Search Appliance (GSA) y cun n design che s’adatëia ince ai fonins y smartphones. Tratan la conferënza stampa á l’assessuria provinziala Waltraud Deeg ince presenté la direturia nöia dl’Agenzia por la familia. Al se trata de Gudrun Schmid, esperta de pedagogia che á lauré dal 2005 al 2008 sciöche direturia dl Ofize familia y che á ince realisé proiec importanc sciöche Bookstart y les lëtres ai geniturs. Schmid sará la direturia de n team da 15 porsones. „Le compit prinzipal dl’agenzia sará chël da mët en pratica y coordiné les mosöres elaborades dala Provinzia tla tematica dla familia, mo nia ma. Laorun ince por mët les families tres de plü tl zënter de proiec de informaziun, sensibilisaziun y consulënza“, á dit la direturia nöia Schmid.
rc
Galaria dales fotografies
