N per de lus tl raiun dla Alta Valdenon
Na fotografia fata dala Forestale confermëia la presënza de n per de lus sön le confin danter Südtirol y le Trentin. I esperc: ai podess cherié n grup familiar.
Tl contest dles ativités de monitoraje dla fauna fates dala Forestala de Trënt en colaboraziun cun i rapresentanc dla Provinzia de Balsan él sté poscibl da confermé la presënza de n per de lus tl’Alta Valdenon, tl raiun che confinëia cun le Südtirol. I dui lus é tomá te na tënora fotografica ai 16 d’agost. Al se trata insciö de na proa ajuntiva dla presënza di lus te chësc raiun do la segnalaziun de ai 15 de jügn. I esperc arata che al se trata cun gran probabilité de n mandl y na baibele y che podess cherié n grup familiar cun la proscima aisciöda. „La Repartiziun provinziala Forestes se crüziará da informé la popolaziun te na manira adatada de sciöche chësta situaziun se svilupëia“, á dit le diretur dl Ofize Ciacia y pëscia Luigi Spagnolli.
rc
