Ediziun nöia dl proiet Promemoria_Auschwitz
Percurs formatif y iade dla memoria tla storia dl Nücënt. Presentaziun ai 7 d’otober cun i assessurs Tommasini, Mussner y Achammer.
Cun le sostëgn finanziar dla Provinzia de Balsan y de Trënt y dl Land Tirol, á le grup de laur di Sorvisc ai jogn Agjd, Arci y „Juff Tirol“ elaboré na colaboraziun interregionala che ti dará indô la poscibilité a 164 jogn y jones dl Südtirol da tó pert al’ediziun nöia de „Promemoria_Auschwitz“, le iade dles recordanzes, adöm cun jogn y jones dl Trentin y dl Tirol. Le proiet é na gran oportunité por inrescí la storia dl Nücënt tres n iade y n percurs formatif che é gnü arjigné ca aposta por chësta scomenciadia adöm al’assoziaziun „Deina“.
Öna dles chestiuns plü scüres y tragiches dla storia europea é l’eliminaziun de 6 miliuns de iüdes, de Rom y Sinti, de omossessuai, de opositurs dla politica y de porsones cun handicap che é öna dles ferides plü granes dl continënt Europa y che resta na tematica fondamentala de formaziun dles generaziuns che vëgn docá. Chësta tematica gnará aprofondida y inrescida ince cun le iade dles recordanzes „Promemoria_Auschwitz“ portan i jogn ince ai ciamps de conzentramënt de Auschwitz y Birkenau.
Un di obietifs prinzipai por i jogn é da fá n’esperiënza direta por mantigní ví le recort y por ester ince portadus dla cosciënza di avenimënc sozedüs por che ai ne sozedes mai plü. L’ediziun nöia dla scomenciadia gnará presentada tl contest de na conferënza stampa di rapresentanc dles assoziaziuns che organisëia l’evënt adöm ai assessurs provinziai por la scora y la cultura, Christian Tommasini, Florian Mussner y Philipp Achammer
en jöbia, ai 7 de otober dl 2016,
dales 09:30
tl salf stampa
al intern dl palaz Widmann
plaza Silvius Magnago 1
a Balsan.
rc
