Consëi scolastich provinzial: Edith Ploner confermada presidënta
Le Consëi scolastich nü s'á incunté incö ai 03/10 por la pröma sentada: litaziun di trëi presidënc cun le renovamënt de presidënza por l'ispeturia Edith Ploner.
Incö ai 3 d'otober se á le Consëi scolastich provinzial incunté por le pröm iade do les litaziuns di comëmbri nüs d'aurí dl 2016 y do la nominaziun ofiziala da pert dla Junta provinziala ai 13 de setëmber. Le Consëi scolastich provinzial é n organ consultif cun indöt 63 comëmbri: 40 de chisc fej pert dl monn dla scora todëscia, 15 é i rapresentanc dles scores de lingaz talian y 8 dles scores paritetiches ladines. Tles sentades plenares dl Consëi scolastich, che aconsiëia la Junta provinziala, vëgnel traté les chestiuns che reverda düc trëi i sistems scolastics provinziai, sciöche por ejëmpl i proiec de leges provinziales nöies, normatives y propostes de mudamënt dl calendar scolastich. Les problematiches che reverda ma un n grup linguistich vëgn analisades tles seziuns aposta. L'assessur pro la scora ladina Florian Mussner á sotligné por l'ocajiun „che le Consëi scolastich é n punt d'incuntada danter les realtés desvalies y che á insciö la funziun de lian deache la formaziun é la basa por nosta sozieté dantadöt ince por le dagní y por renforzé le spirit europeich“. Implü é la consulënza y i arac dl Consëi scolastich na nezescité indespensabla por les dezijiuns dla Junta, insciö Mussner.
Le Consëi scolastich é le gremium democratich plü ampl al'intern dl sistem scolastich dla Provinzia che reverda sides rapresentanc politics co ince istituzionai, dles scolines y scores y dles comunités teritoriales y economiches de referimënt. Le presidënt/la presidënt vëgn litada a rotaziun: ti pröms trëi agn surantól naota 18 mëisc porom Sporer Werner y spo Chiaramonte Maria Rita la presidënza. Por le cuarto ann sará spo l'ispeturia dles scolines ladines Edith Ploner la presidënta dl Consëi scolastich provinzial. Le sistem de litaziun a rotaziun prevëiga ince che i atri dui rapresentanc cür ince l’inciaria de vizepresidënt/a. Do la litaziun á l'ispeturia Ploner rengrazié por la crëta y á sotligné che „ara nen jará sëgn da lauré inant sön la basa di bugn resultac bele arjunc ti ultims agn te chësc gremium fondamental por le svilup de nosc sistem scolastich, ince deache al é n punt de racoiüda y de barat d'odüdes de düc trëi i sistems scolastics dla Provinzia“.
La Scora Ladina á indöt 8 comëmbrei che fej pert dl Consëi (cun 12,7 porcënt di 63 comëmbri é la rapresentanza sura le proporz). L’assessur ladin Florian Mussner y l’intendënt Roland Verra é cumëmbri de dërt. Pro la categoria di ispeturs él gnü lité l’ispeturia dles scolines ladines Edith Ploner, pro la categoria dl personal didatich él gnü lité Rosmarie Senoner (Scolines), Ingeborg Dejaco (Maestri ladins Val Badia), Walter Pescosta (Scoles autes Gherdëina). I rapresentanc di geniturs y di scolars é por i proscims cater agn por les scores ladines Ivana Peristi (geniturs) y Diego Glück (scolars).
Por ci che reverda ma un n grup de lingaz vëgnel lauré te seziuns, tla seziun ladina vëgnel ciamó lapró ai 8 rapresentanc: Verena Niederegger Senoner (rapresentanta di insegnanc de religiun), Silvia Lantschner (rapresentanta di insegnanc dles scores profescionales), Heinrich Videsott (categoria di Comuns), Paul Videsott (rapresentant dla Université Lëdia da Balsan), Andrea Tardivo (rapresentant dles ciases de sojornanza di studënc y scolars).
rc
Galaria dales fotografies
