L raion da jì cun i schi Ciastel-Mont de Sëuc ne unirà nia amplià
La Jonta provinziela à refudà la pruposta per l ampliamënt dl raion da jì cun i schi de Ciastel y la Mont de Sëuc.
Per rejons sozioeconomiches y teles liedes al’ecologia dla cuntreda y al trafich à la Jonta provinziela ncuei deliberà de refudé la pruposta d'ampliamënt dl raion da jì cun i schi de Ciastel y si cunliamënt cun la Mont de Sëuc. La sozietà dla furnadoia Marinzen Srl, aldò dl plann de setor, à prejentà n stude de fatibltà per cunlië i raions da jì cun i schi de Ciastel y la Mont de Sëuc. L stude, che fova unit apurvà dal Chemun de Ciastel, reverda n ntervënt ntegratif per l ampliamënt dl raion da jì cun i schi “Marinzen” cun cunliamënt diret tres n mplant portamont da cabines al raion da jì cun i schi “Seiser Alm”.
L iter dla pruzedura de valutazion ie unit stlut jù cun i arac prejentei dal Cumité ambientel y dal Ufize planificazion teritoriela y ie ruvà sun mëisa dla Jonta provinziela che à valutà la usservazions sun pruposta dl assessëur Richard Theiner. Ncuei se à la Jonta detlarà a una sibe cun l arat negatif dl Cumité ambientel sibe cun la relazion ressuntiva sun l stude de fatibltà laureda ora dal Ufize planificazion teritoriela y la à tëut la dezijion de refudé l proiet ntegratif ti raions da jì cun i schi Ciastel y Mont de Seuc.
D’agost ova l Cumité ambientel dat n arat negatif sun l proiet y śën à l Ufize planificazion teritoriela prejentà na relazion ressuntiva sun l stude de fatibltà per ti dé ala Jonta n cheder cumplessif dl ntervënt. Da chësc cheder vëniel ora che l ntervënt purtà dant ne plej nia y chël no de viers dl profil dl ambient, dla cuntreda y dla natura ma nianca de viers dla strategia n cont di aspec sozioeconomics y dla viabltà. Perchël, dij la relazion, ne pudëssa l ntervënt nia respeté i prinzips de sustenibltà che ie de bujën per la realisazion de operes de detel mesures..
Danter i autri aspec lecorda la la relazion di tecnics l estrat dal plann de setor di mplanc portamont y di purtoies de schi, apurvà dala Jonta provinziela tl 1994 n cont dla cumetuda de schivé n segondo azes ala Mont de Sëuc da Ciastel o da Sëuc sce n ëssa realisà n mplant portamont cun stazion a val nluegeda te una dla doi frazions.
usp
