Ospedal de Sterzing: La neuroreabilitaziun vëgn ampliada
La Junta provinziala, l’Aziënda sanitara y le responsabl sanitar Saltuari á ciafé n’acordanza por amplié la repartiziun de neuroreabilitaziun cina a 21 posć.
La repartiziun dla neuroreabilitaziun dl ospedal da Sterzing dess gní ampliada dai 15 posć por paziënc atuai por rové cina a 21 lec. Chësta dezijiun é gnüda presentada incö, lönesc ai 10 d’otober, dal presidënt dla Provinzia Arno Kompatscher, dal’assessuria Martha Stocker y dal responsabl sanitar Leopold Saltuari. „La dezijiun da amplié chësc setur dla cura sanitrara é ince n sëgn important por la localité de Sterzing: l’ospedal ne gnará insciö nia ma mantigní, mo amplié vare por vare“, á sotligné le presidënt dla Provinzia Arno Kompatscher. L’assessuria por la sanité Martha Stocker á ince recordé l’importanza dl ampliamënt dla repartiziun nia ma por la cualité dla cura sanitara en general mo ince por le marcé dl laur. „Por garantí le bun funzionamënt dla repartiziun cun i 15 posć por paziënc él nezesciar da aumenté le personal sanitar“, insciö Stocker. Por rové spo man man ince cina ai 21 lec sarál debojëgn de dötadöm 11 infermiers, dui spezialisć dl’ergoterapia y dui assistënc por la cura di paziënc. „I fajarun de döt por renforzé y amplié chësc zënter d’ezelënza“, á dit l’assessuria por la sanité.
„Le gran vantaje por i abitanc dl Südtirol é che por podëi se anuzé de n’oferta de terapia otimala ne sarál nia nezesciar tl dagní da jí a Hochzirl o a Verona, mo da resté tl raiun südtirolej“, á dit le diretur sanitar Saltuari recordan che „Sterzing é te na buna posiziun y che insciö sarál ince poscibl da jí inant cun le laur scientifich.“ N cer’numer de lec é nezesciar, insciö Saltuari, deache les porsones mëss gní tutes sö por plü mëisc. Le suranstant sanitar dl ospedal da Sterzing Franz Ploner y le presidënt dla Comunité comprensoriala dl’Alta Val d’Isarch Karl Polig á dit che chësta acordanza é n segnal important por döt le raiun y por döta l’assistënza sanitara tl Südtirol. Contentëza por la dezijiun é ince gnüda anunziada dal diretur sanitar raional Markus Markart, dal dotur Stephan Obletter y dala suranstanta di sorvisc de cura sanitara Emmanuela Pattis.
rc
