Stipendiums post Université: 1,7 miliuns tl bilanz 2017
La Provinzia sostëgn i studënc che vá inant cun la formaziun ince do la contlujiun dl'Université cun n master, dotorac d’archirida, practicums y d’atri stüdi.
Ara é de 1,7 miliuns de euro la soma preodüda tl bilanz 2017 por sostigní dal punt de odüda finanziar i studënc südtirolej che á l’intenziun da jí inant cun le percurs de stüdi ince do la formaziun universitara. La soma gnará spartida sö tres stipendiums por i studënc che frecuentëia tla Talia o foradecá master de pröm o secundo livel, dotorac d’archirida, practicums y cursc de spezialisaziun. Por podëi podëi fá domanda mëss i candidac ester residënc da almanco dui agn tl Südtirol y la formaziun mëss ester aldinfora di confins provinziai, o sce i cursc vëgn efetuá tl Südtirol mëss i candidac avëi la zitadinanza dl’Uniun europeica.
Danter les condiziuns damanades vëgnel ince stabilí che le davagn ne pó nia avëi superé i 32mile euro por n master, dotorac y cursc de formaziun y i 20mile euro por i practicums, ann de referimënt é le 2015. I candidac che fej domanda messará fá na formaziun post-universitara te na perioda danter al 1 de otober dl 2016 cina ai 29 de setëmber dl 2017 y ne podará s’anuzé de degun ater finanziamënt por la formaziun y ne podará nia bele avëi stlüt jö na formaziun post-universitara tl medemo setur. La contlujiun dl percurs universitar ne podará nia ester plü de 6 agn vedla dal momënt dla domanda.
“Al se trata de n contribut important – á sotligné l’assessur Philipp Achammer – dantadöt por ci che fajará chësc ann i practicums de formaziun por ciafé l’abilitaziun al insegnamënt dles scores mesanes y altes.” I stipendiums jará da n import de 2.500 euro a n mascimo de 9mile euro al ann sön la basa dl percurs de stüdi, dal numer di credits de formaziun, dl numer de ores damanades y dla situaziun economica dl candidat. Les domandes podará gní dades jö dal 1 de jená dl 2017 inant cina ai 29 de setëmber dl 2017 pro l’Ofize Dërt al stüde universitar, strada via Andreas Hofer 18 a Balsan (0471412950 – diritto.studio@provincia.bz.it). Düc i formulars da scrí fora gnará publicá tosc sön la plata www.provincia.bz.it/diritto-allo-studio.
rc
