Dala Junta: d’atres dezijiuns importantes de ai 11/10
Le trafich tla Val d’Isarch, les sovenziuns por le sorvisc dla mensa, la nominaziun dla comisciun por la responsabilité sanitara y d’atres dezijiuns da incö.
Sovenziuns por les cooperatives che manajëia la mensa por studënc dl’université, n grup de laur por ciafé mosöres cuntra le pëis dl trafich tl’Alta Val d’Isarch, la nomina di mëmbri dles consultes culturales y dla comisciun nöia por chestiuns de responsabilité sanitara é stades n valgönes dezijiuns importantes tutes dala Junta provinziala incö ai 11 d’otober a Balsan. La conferënza stampa é gnüda tignida dal vizepresidënt Christian Tommasini y dal assessur Philipp Achammer en rapresentanza dl presidënt Arno Kompatscher che é a Bruxelles.
Ince les sovenziuns por la mensa fej pert dl contest dles mosöres de sostëgn garanties dal dërt al stüde. I critérs y les modalités de sovenziun di sorvisc dla mensa por studënc dl’université é gnüdes aprovades incö ai 11 d’otober dala Junta provinziala y che stabilësc por le pröm iade les diretives varëntes por döt le Südtirol. Da sëgn gnarál assegné i contribuc diretamënter les cooperaziuns che fej chësc sorvisc zënza intenziuns de davagn a chëstes tarifes: por n menü cun pröm, secundo, pan y dessert messará i studënc paié 4,33 euro, y cun n contribut provinzial por les cooperatives de 5,47 euro che dess spó curí les spëises che resta di cosć. Les cooperatives y assoziaziuns interessades pó fá süa domanda cina ai 31 d’agost de vigni ann pro l’Ofize Dërt al stüde.
Implü á la Junta stabilí da cherié n grup de coordinamënt cun le compit da inrescí mosöres concretes por alisiré le problem dl trafich tl’Alta Val d’Isarch. I mëmbri ne é nia ciamó gnüs stabilis, mo le grup de laur sará formé da rapresentanc dla Provinzia, dl’autostrada dl Prener y dla Comunité raionala dla Val d’Isarch. „Le problem é bele conesciü da plü tëmp y al ne reverda nia ma le trafich sön l’autostrada, mo te na manira particolara ince chël danter Campo Trens y le confin“, á dit le vizepresidënt dla Junta Christian Tommasini. Le grup de coordinamënt dess lauré fora mosöres concretes.
Tres por ci che reverda le trasport á l’assessur por l’ambiënt Richard Theiner sotligné che la Junta provinziala fajará döt le poscibl por evité l’ampliamënt dl’autostrada Alemania che é gnü aprové dala comisciun trasporc dl Parlamënt europeich. L’assessur Theiner recorda te chësta ocajiun ince che la Convenziun dles Alpes, cun l’ezeziun dl protocol di trasporc, vëgn ince sostignida dala Talia y che prevëiga la proteziun y la conservaziun dles Alpes. „La costruziun de n coliamënt stradal nü vá cuntra i obietifs detlará dala Conveziun“, insciö Theiner che recorda ince che la macroregiun alpina Eusalp á danter sü obietifs na „mobilité che respetëis deplü l’ambiënt, le clima cun coliamënc moderns“.
La Junta provinziala á implü nominé incö la comisciun d’apajamënt por chestiuns de responsabilité sanitara y che á n’inciaria de trëi agn. La comisciun d’apajamënt é n organ independënt y competënt por düc i caji te chi che n paziënt é dla minunga che süa sanité sides gnüda danajada da n fal de n dotur tratan l’analisa, la terapia o da na desmentianza o da n’informaziun falada sön la situaziun sanitara dl singul. Le sorvisc é debann y nia d’oblianza y la comisciun á traté ti ultims 9 agn indöt 272 caji che á porté prësc tres a na soluziun te 6 mëisc cun n sparagn nia ma de tëmp mo ince de ressurses finanziares. La comisciun nöia é gnüda nominada incö dala Junta provinziala sön proposta dl’assessuria por la sanité Martha Stocker, le presidënt nü é le vicar Oswald Leitner y i mëmbri é la doturia spezialisada Antonia Tessadri y l’avocadëssa Silvia Winkler. I mëmbri de sostituziun é indere Edoardo Mori, Fabrizio Zappaterra y Stefan Vale.
N’atra dezijiun dla Junta é stada incö la nominaziun, sön proposta di assessurs Achammer y Tommasini, di mëmbri dles consultes culturales por le grup linguistich talian y por chël todësch. Por ci che reverda la Consulta culturala taliana, de chëra che al fej pert 16 mëmbri, él gnü nominé Patrizia Donadio, Pio Fontana, Luca Sticcotti, Alessandra Limetti, Frida Carazzato, Federica Viganò, Marco Bernardi, Emanuele Masi, Luca Barbieri, Birgit Oberkofler, Beate Weyland, Barbara Nesticò, Andrea Zeppa, Luca Bizzarri y Abdel Jabbar. Componënc de suplënza sará Daniela Ferrari, Giacomo Fornari, Antonella Arseni y Fabio Zamboni. Düc i mëmbri dla consulta culturala todëscia é gnüs confermá, de conseguënza é la consulta formada da: Klaus Runer, Erich Deltedesco, Josef Fauster, Helga von Aufschnaiter Straudi, Georg Mühlberger, Albert Willeit, Sabine Gamper, Klaus Hartig, Doris Brunner, Eva Gratl, Günther Oberhollenzer, Anton von Walther, Florian von Ach, Kunigunde Weissenegger y Toni Bernhart. I dui assessurs fej pert de dërt dles consultes che á l'inciaria cina la fin dla legislatöra.
rc
