Contrat dependënc publics, firma danter Provinzia y sindacac
Löm vërda al contrat coletif nü por i 40mile dependënc publics dl Südtirol. A desposiziun 125 miliuns por trëi agn dal 2016 al 2018.
40 euro implü te busta paga dal 1 de messé dl 2016 inant (cun i efec che vá zoruch cina a chëra data) y atri 40 euro, che fej indöt 80 euro lordi, dal 1 de ma dl 2017 inant. Y implü ince na cuota che le datur de laur paiará por ci che reverda la contribut ala previdënza complementara dal 2017 inant, y dal 2018 inant ince la creaziun de n fonds por les prestaziuns sanitares cun i detais che messará ciamó gní stlaris te n’acordanza futura, mo por chëra che al é bele gnü metü a desposiziun i mesi finanziars. Chisc é i punc prinzipai dl contrat coletif „intercomparto“ nü por i agn 2016 – 2018 y che reverda indöt 40mile dependënc publics danter Provinzia, Aziënda sanitara, Comuns, Ciases de palsa, Comunités raionales, IPES y aziëndes de sojornanza. La firma preliminara é gnüda fata incö ai 13 d’otober tl Palaz Widmann dai rapresentanc dla delegaziun publica y dl’organisaziun di sindacac, y denant co l’aprovaziun definitiva dla publicaziun dl Boletin ofizial dla Regiun Trentin-Südtirol sarál nezesciar de ciamó n passaje formal tla Junta provinziala.
„I sun la pröma Provinzia che stlüj jö les tratatives por le contrat nü de intercomparto – á sotligné le presidënt dla Provinzia Arno Kompatscher – y i sun contënc de ci che i podun ti pité a nostes colaboradësses y a nüsc colabroadus.“ Kompatscher y l’assessuria por le personal Waltraud Deeg á rajoné de na „soluziun sostenibla de dorada lungia ciafada do tratatives lungies. Nia ma la chersciüda di davagns é n dat positif mo ince le mioramënt dla pert de assistënza y previdënza.“ N passaje importat reverda por l’assessuria Deeg ince chël che reverda i tëmps de palsa di geniturs: „Cina sëgn él poscibl por i peri y les umes da tó na perioda de palsa cina i 8 agn di mituns, cun le contrat nü vëgn le termo alzé ai 12 agn.“
Dal punt de odüda finanziar é les somes aprovades por la perioda 2016-18 de 125 miliuns de euro, 12 implü de chi metüs a desposiziun bele l’ann passé tres l’adatamënt di davagns. „Te n tëmp tres plü ri por les finanzies publiches ne é chësta alzada dl davagn nia ma n pice sëgn, conscidran ince che le contrat respetëia les condiziuns preodüdes dal pat de stabilité“, insciö Kompatscher. Contënt dl’acordanza arjunta ince le diretur general dla Provinzia Hanspeter Staffler che recorda che „do agn de architades sun stá bugn da fá pié ia les tratatives bele dai pröms mëisc dl 2016. Ince por merit dles tröpes incuntades y dl impëgn de dötes les perts interessades sun stá bugn da ciafé n resultat positif te cört tëmp.“
rc
Galaria dales fotografies
