Regiun: surandada na statua dl simposium Toni Gross de Fascia
Na statua de lëgn realisada dal artist Tomaso Baldassarra é gnüda suranda incö tla sënta dla Regiun a Trënt al presidënt Kompatscher y al assessur Detomas.
Tl mëis de setëmber, tratan la terza ediziun dl simposium Toni Gross, competiziun dl ziplé fasciana, s’á le zënter de Poza trasformé te n laboratore artistich alaleria. Önesc artisć, partis sö te döes seziuns danter artisć ghesć y studënc da denant dl’Istitut d’Ert de Poza, á lauré por 5 dis alalungia sön na taia de lëgn porvan da ziplé tl lëgn le conzet de „Le monn ladin tl patrimone UNESCO“. Ai 10 de setëmber él spo na iuria che á stabilí i davagnadus y por la categoria ghesć é la devënta jüda a Carlo Abbà y por la categoria studënc da denant a Paolo Costazza. La iuria á implü tut la dezijiun da assegné na „menziun“ al’opera Musa de Tomaso Baldassara por avëi conzepí n’opera artistica che prevëiga n’interaziun danter scoltöra y osservadú y che porta a n’esperiënza sinestetica alternativa.
Incö, vëndres ai 14 d’otober, é chësta statua gnüda scincada te na picera zerimonia ofiziala a Trënt ala Regiun Trentin-Südtirol che é un di sponsors dl contest de scoltöra. „Al me fej dër plajëi ester presënt incö por chësta ocajiun, ince deache al é dër important che la Regiun dais so sostëgn a scomenciadies de promoziun artistica. I pó ince garantí che le sostëgn da pert istituzionala jará inant ince tl dagní“, á dit le presidënt dla Regiun Arno Kompatscher che é sté presënt ala surandada ofiziala adöm al assessur por les mendranzes Giuseppe Detomas. L’assessur ladin á recordé l’importanza dla colaboraziun danter la Regiun, la Scola Ladina de Fascia, i ënc locai y les assoziaziuns culturales fascianes por la promoziun dla cultura y dl’identité ladina: „La valorisaziun dla cultura y dl’ert ne pó nia se deslié dal reconscimënt dla diversité y dl valur dl confrunt che é un di stromënc plü adatá por renforzé la cultura dla convivënza y por la promoziun dl’autonomia por svilupé inant nosta comunité ciaran tres al dagní“, á dit Detomas.
rc
Galaria dales fotografies
