Dala Junta: Sostëgn ales stotöres por mituns ti raiuns sanitars
La Junta provinziala á aprové n contribut de 600mile euro por l’assistënza di mituns dl personal sanitar ti cater raiuns sanitars.
La conziliaziun danter familia y laur é n impëgn important por tröc geniturs. „Chësc vél ince por i peri y les umes che laora tl setur dla sanité y che ne pó nia tres avëi n tëmp de laur regolamenté y sön passaji avisa por le barat dl turnus de laur“, sotlignëia l’assessuria provinziala por la sanité Martha Stocker. La Junta provinziala á insciö confermé le contribut anual de 600mile euro a bëgn di sorvisc d’assistënza por i mituns dl personal di cater raiuns sanitars. Insciö gnarál metü a desposiziun chësc sorvisc tla sënta dla „Claudiana“ por le raiun sanitar de Balsan en colaboraziun cun la cooperativa „Casa Bimbo/Tagesmutter“ por en valur mesan de 28 mituns, tla sënta dl ospedal da Maran vëgn le sorvisc manajé dala cooperativa soziala „Quarantacinque“ cun indöt 60 mituns y mitans. D’atres strotöres che vëgn sostignides dala Provinzia tres chësc contribut é la strotöra d’assistënza dl Porsenú cun 15 mituns manajé da „Quarantacinque“ y implü vëgn l’assistënza dla pröma infanzia ince garantida tl ospedal da Bornech tres na convenziun cun l’assoziaziun „Die Kinderfreunde Südtirols“ cun 7 posć.
„Sciöche aministraziun publica él nosta intenziun da dé n bun ejëmpl por sostigní te na manira adatada les families“, spliga l’assessuria por la sanité Stocker motivan l’intervënt por i geniturs che laora tl sorvisc sanitar provinzial. Con la continuaziun dl sostëgn por i mituns él l’Aziënda sanitara che ó ince archité le trend de mancianza de personal spezialisé ti ospedai. „Tröc colaboradus á insciö na motivaziun implü da gní zoruch plü adora o da conzilié le laur cun l’assistënza tles families“, á dit Stocker.
rc
