Dala Junta: investimënc ti ospedai, 62 miliuns te 5 agn
La soma de indöt 62 miliuns de euro gnará investida cina l’ann 2020 por intervënc ti ospedai dl Südtirol.
Al se trata de na seria de intervënc strotorai che gnará a se le dé cina l’ann 2020 por investimënc de indöt 62 miliuns de euro. La Junta provinziala á aprové sön proposta dl’assessuria Martha Stocker le program de finanziamënt di laurs de manutenziun y restrotoraziun dl’Aziënda sanitara südtiroleja por la perioda 2016 – 2020. I investimënc preodüs é de 62,58 miliuns de euro, partis sö cun 7,5 miliuns por le 2016, 17 miliuns por le 2017 y 2018, 11 miliuns por le 2019 y indöt 10 miliuns por le 2020. Danter i intervënc sarál laurs d ampliamënt di salf da operé, dl pröm aiüt y de atri reparc dl ospedal da Bornech, indere ti ospedai da Maran, Porsenú y Bornech él preodü la metüda a desposiziun de locai por la cumpra de mascins spezialistiches nöies. Danter i laurs él ince le smendrimënt dles barieres architetoniches, l’esecuziun de n vagügn laurs che reverda la segurëza, l’introduziun de sistems de scialdamënt y le rafredamënt por smendrí le conums energetich.
rc
