Junta dl’Euregio: presentaziun calënder cultural y d'atres dezijiuns
La Junta dl’Euregio á presenté incö ai 19 d’otober le calënder cultural nü dl’Euregio cun le layout ince por Ladin. Colaboraziun preodüda cun manif.it
Al é nasciü na spersa por incuntades culturales nöies por döt le raiun dl’Euregio, Südtirol – Tirol – Trentin. Le portal nü á inom Contakt (contakt.europaregion.info) y al é nasciü sciöche na racoiüda nöia de düc i apuntamënc che reverda mostres, musica, teater, leteratöra, danza, film y festivales tl raiun dl’Euregio. Le layout á da ciafé por ladin, todësch, talian y inglesc. „Contakt é n stromënt dër important che nes pormënt de s’informé sön döt ci che sozes tl raiun dl’Euregio“, á splighé le presidënt südtirolej Arno Kompatscher. Le prinzip dl proiet é chël dla comunicaziun partizipativa. I organisadus de evënc pó insciö se scrí ite y inserí te na manira automatica düc i apuntamënc ince registran la locaziun tres Google maps.
Por ci che reverda i apuntamënc y i cursc tles valades ladines él preodü na colaboraziun cun le portal Manif.it dl Istitut Ladin Micurá de Rü, olache an pó bele ciafé sëgn dötes les informaziuns sön conzerc, referac, cursc, mostres, seminars y tröp d’ater tla Val Badia y te Gherdëna. Sön Contakt sarál ince da ciafé na seleziun di avenimënc plü importanc dl mëis. Danter i obietifs di ideadus dl portal nü él ince da amplié l’azes al’oferta cultruala dl’Euregio cun alisiraziuns por la mobilité y l’entrada ales scomenciadies. Al é insciö preodü ince colaboraziuns cun le Family Pass y l’Euregio Pass por studënc dai 14 ai 26 agn.
Les atres dezijiuns: Historegio, scomenciadies deboriada, Alemania, chestiun muciadus, Euregio Family Pass
Atri punc debatüs ince dala Junta Gect a Ciastel Toblino é ince stá na colaboraziun plü strënta danter les universités dl’Euregio por ci che reverda la storia regionala. Le proiet Historegio á sciöche obietif chël da promöie i inrescidus jogn di raiuns euroregionai y da mët a desposiziun a n publich ampl l’archirida storica ince tres i social media. Implü á la Junta ince aprové incö le bilanz 2017 da 2,8 miliuns de euro y che reverda proiec ti seturs dla mobilité, dl trafich, dl’archirida, dl’economia, dla cooperaziun, dl’integraziun y dla cultura. De plü sará ince les scomenciadies cun danter l’ater le Festival dla Jonëza dl’Euregio, passan al’ediziun nöia dl’Academia dl’Euregio, le Summer Camp, le Sport y Music Camp. Tl 2017 gnarál ince presenté le Euregio Family Pass, na cherta cun alisiraziuns por families.
La Junta dl’Euregio á ince tut posiziun söl proiet dl prolungamënt dl’autostrada Alemania che dess passé ince por le Südtirol. La Junta dl’Euregio á sotligné che ara é daldöt decuntra al proiet. „Nia ma foss la costruziun de n’autostrada nöia na violaziun dla Convenziun dles Alpes, mo l’obietif prinzipal dl’Euregio resta la promoziun dl trafich sön scines y porchël resta n coliamënt autostradal nü na proposta inazetabla“, insciö Kompatscher. La Junta á ince tut la dezijiun da aprové n master de livel post universitar dediché ai temesc europeics por funzionars publics dles aministraziuns teritoriales dl’Euregio y che dess gní manajé dal’Université de Balsan. Ince la chestiun di muciadus é gnüda tratada dala Junta cun le presidënt Kompatscher che á dit che „l’Euregio á desmostré da savëi da afronté la tematica di muciadus deboriada y te na manira unitara".
rc
