Industria 4.0: Mussner a Roma incunta dui ministri
Dl proiet Industria 4.0, de chël che al fej ince pert la Provinzia, él gnü rajoné a Roma cun i ministri Calenda y Giannini. Presënt ince l’assessur Mussner.
Tratan n’incuntada a Roma cun la ministra dl’istruziun, université y archirida Stefania Giannini y cun le minister dl svilup economich Carlo Calenda, de plü rapresentanc politics dl Friul-Aunejia-Iulia y dles provinzies de Balsan y Trënt y esponënc dles istituziuns universitares y scientifich-tecnologies dl Friul-Aunejia-Iulia y dles Provinzies él gnü debatü dles propostes por la creaziun y le finanziamënt de n zënter de competënza y archirida dl Nordest tl contest dl proiet „Industria 4.0“ sostigní dal Govern.
Les ghiranzes dl Südtirol é gnüdes presentades dal assessur provinzial Florian Mussner, dal retur dl’Université Lëdia de Balsan Walter Lorenz, da so suzessur designé Paolo Lugli y dal preside dla facolté de sciënzes y tecnologies Stefano Cesco. L’assessur Mussner á recordé che „l’autonomia, l’université, l’economia y l’aministraziun publica é na garanzia adöm a nosta colocaziun geografica, che sotlignëia na vocaziun internazionala. Chësta realté y la presënza de tröpes aziëndes produtives é la condiziun por cherié n sistëm adöm ales atres Regiuns“. Sön chësta strada él insciö important da savëi da adoré les ezelënzes ti seturs dl’archirida y dles conescënzes scientifiches y tecnologiches, por lauré adöm te n zënter de competënza sciöche preodü dai obietifs dl’Industria 4.0 y da cherié n lian sterch danter les aziëndes locales y l’inovaziun tecnologica.
I responsabls dla LUB á recordé che tles arees dl Nordest él tröpes aziëndes de suzes che laora en sinergia cun les universités y i zëntri d’archirida dl teritore y che pó isnciö fá avarëi sües ezelënzes por promöie l’inovaziun. Por ci che reverda le Südtirol reverda chësta ezelënza te na manira particolara le potenziamënt dl’archirida aplicada. I ministri Giannini y Calenda á saludé cun contentëza le spirit de colaboraziun y de n laur deboriada dles Regiuns che corespogn ai obietifs dl proiet dl govern. Les universités é insciö gnüdes inviades a elaboré n plann d’aziun coletif che gnará presenté ai Ministri tl cheder dles tratatives sön le finanziamënt y söl budget dl’Industria 4.0.
rc
