Oblianza di defribiladus tl sport prorogada al pröm de jená 2017
L’oblianza dla presënza de defribiladus por les uniuns sportives amatoriales é gnüda prorogada dal 30 de novëmber al 1 de jená dl 2017.
L’oblianza di aparac de reanimaziun por les uniuns sportives amatoriales sará varënta dal 1 de jená dl 2017 inant. La prorogaziun é gnüda stabilida cun n decret lege de ai 17 d’otober dl 2016 tl contest di intervënc por les popolaziuns atocades dal tremoroz y reverda döt le teritore statal. De conseguënza messará dal 1 de jená dl 2017 inant les uniuns sportives amatoriales garantí la desponibilité de n defibriladú y la presënza de na porsona autorisada da podëi le adoré tratan les gares y i alenamënc.
Tl Südtirol él gnü stabilí cun na delibera dla Junta provinziala dl 2014 da trasferí l’oblianza dla presënza de n defibriladú dales assoziaziuns sportives ai proprietars di implanc. La norma definësc insciö che düc i implanc dl sport südtirolej, ince i implanc dl sport scolastics y daverc al publich, mëss avëi almanco un n aparat de reanimaziun y che chësc mëss ester te na posiziun saurida da arjunje da vigni pert dl implant por podëi garantí l’efiziënza de n intervënt de prescia y reanimaziun.
rc
