La nöt dla plüra y dla consolaziun tl Museum Ladin ai 28 d'otober
Na sëra cun n tema particolar por daidé porsones che á pordü na porsona amada y che mëss se confronté cun la plüra vëgn organisada ai 28/10 tl Museum Ladin.
En vëndres, ai 28 d’otober dales 19.00 ales 22.00 zirca vëgnel organisé tl Museum Ladin Ciastel de Tor la „Nöt dla Plüra y dla Consolaziun“, na sëra ponsada por düc chi che plüra na porsona a chëra che ai ti á orü bun, belanfat tan te tëmp che al é passé. L’obietif dla scomenciadia é chël da daidé da se confronté cun la plüra adöm cun acompagnadus cualificá y volontars dla Caritas. Tratan la sëra gnarál metü a jí de plü meditaziuns y situaziuns d’incorajamënt y confrunt personal. La Nöt dla Plüra y dla Consolaziun vëgn organisada dal Sorvisc Hospice dla Caritas en colaboraziun cun le Raiun Sozial Val Badia. La partezipaziun é debann, an ne mëss nia se prenoté.
Por informaziuns plü menüdes: Sorvisc Hospice dla Caritas, strada.-v.-Sternbach 6, Bornech, tel. 0474 413978, hospiz.bruneck@caritas.bz.it o pro le Raiun Sozial Val Badia, tel. 0474 524504 (ma danmisde).
Ai 31 d’otober sarál spo davert por l’ultim de le Museum Ladin Ciastel de Tor a San Martin y le Museum Ladin Ursus Ladinicus a San Ciascian dan la palsa da d’altonn. I dui museums dauriará indô ai 26 de dezëmber.
Museum Ladin Ćiastel de Tor, via Tor 65, San Martin de Tor, tel. 0474 524020, www.museumladin.it.
rc
